Amit Shah : “काँग्रेसच्या काळात अरुणाचलचा विकास खुंटला”; अमित शाहांचा मोठा दावा
पंतप्रधान नरेंद्र मोदी यांच्या नेतृत्वाखालील केंद्र सरकारने ईशान्य भारताच्या विकासासाठी आर्थिक मदतीत मोठी वाढ केली असून, अरुणाचल प्रदेशला मिळणाऱ्या निधीतही लक्षणीय वाढ झाल्याचा दावा त्यांनी केला.

Amit Shah – अरुणाचल प्रदेशच्या विकासाकडे काँग्रेस सरकारने दुर्लक्ष केले आणि राज्याला अपुरा निधी दिला, असा आरोप केंद्रीय गृहमंत्री अमित शाह यांनी रविवारी केला. पंतप्रधान नरेंद्र मोदी यांच्या नेतृत्वाखालील केंद्र सरकारने ईशान्य भारताच्या विकासासाठी आर्थिक मदतीत मोठी वाढ केली असून, अरुणाचल प्रदेशला मिळणाऱ्या निधीतही लक्षणीय वाढ झाल्याचा दावा त्यांनी केला.
इटानगर येथे आयोजित कार्यक्रमात बोलताना शाह यांनी केंद्राकडून राज्याला मिळालेल्या आर्थिक मदतीची आकडेवारी मांडली. संयुक्त पुरोगामी आघाडीच्या (यूपीए) सरकारच्या २००४ ते २०१४ या दहा वर्षांच्या काळात अरुणाचल प्रदेशला केंद्राकडून ३३,५३० कोटी रुपयांची मदत मिळाली होती.
राष्ट्रीय लोकशाही आघाडीच्या (एनडीए) सरकारच्या २०१४ ते २०२४ या काळात ही मदत वाढून १ लाख ६४ हजार ६६४ कोटी रुपयांवर पोहोचल्याचे त्यांनी सांगितले. राज्याला मिळणाऱ्या कर हस्तांतरणात चारपट, तर अनुदानात १८ पट वाढ झाल्याचाही त्यांनी उल्लेख केला.
राज्याच्या अर्थसंकल्पाचा आकार १२ हजार कोटी रुपयांवरून ३६ हजार कोटी रुपयांपर्यंत वाढणे हे गेल्या १२ वर्षांतील विकासाचे द्योतक असल्याचे शाह म्हणाले. केंद्र सरकारने ईशान्य भारताला विकासाच्या अजेंड्यात प्राधान्य दिले असून, शिक्षण, आर्थिक प्रगती, युवकांसाठी रोजगार आणि औद्योगिक विकासावर विशेष भर दिला आहे.
सीमावर्ती गावांच्या विकासाचा उल्लेख करताना शाह यांनी ‘व्हायब्रंट व्हिलेजेस’ कार्यक्रमाचे महत्त्व अधोरेखित केले. पंतप्रधान मोदी यांनी सीमावर्ती गावांना देशाची शेवटची गावे नव्हे, तर पहिली गावे असे संबोधून त्यांच्याकडे पाहण्याचा दृष्टिकोन बदलल्याचे ते म्हणाले. सीमावर्ती भागातील नागरिकांना वीज, शाळा, मूलभूत सुविधा आणि रोजगाराच्या संधी उपलब्ध करून देणे आवश्यक असल्याचे त्यांनी नमूद केले.
४० सीमावर्ती गावांमध्ये नागरिकांचे पुनरागमन
‘व्हायब्रंट व्हिलेजेस’ कार्यक्रमामुळे अरुणाचल प्रदेशातील सीमावर्ती गावांमधून होणारे स्थलांतर कमी होण्यास मदत झाली आहे. जवळपास ४० गावांमध्ये नागरिक पुन्हा परतल्याने लोकसंख्येत वाढ झाली असल्याचा दावा अमित शाह यांनी केला. या गावांमध्ये वीज, शाळा, मूलभूत सुविधा आणि रोजगाराच्या संधी उपलब्ध करून देण्यावर सरकार भर देत असल्याचे त्यांनी नमूद केले.






