Sachin Pilgaonkar : सचिन पिळगांवकर झाले ‘डॉक्टर’; मोठ्या कारकिर्दीनंतर विशेष सन्मान !
२१ नोव्हेंबर रोजी पार पडलेल्या विद्यापीठाच्या दीक्षांत समारंभात हा गौरव करण्यात आला. या सन्मानामुळे सचिन पिळगांवकर यांच्यावर चाहत्यांकडून अभिनंदनाचा वर्षाव होत आहे.

Sachin Pilgaonkar : मराठी आणि हिंदी चित्रपटसृष्टीत आपल्या अभिनयाचा ठसा उमटवणारे ज्येष्ठ अभिनेते सचिन पिळगांवकर यांच्या शिरपेचात आणखी एक मानाचा तुरा खोवला गेला आहे.
बालकलाकार म्हणून सुरू झालेला प्रवास, अभिनयातून मिळवलेली लोकप्रियता, दिग्दर्शनातील यश आणि गायनातील वेगळेपण अशा विविध माध्यमांतून तब्बल सहा दशकांहून अधिक काळ प्रेक्षकांचे मनोरंजन करणाऱ्या सचिन पिळगांवकर यांचा आता विशेष सन्मान करण्यात आला आहे.
त्यांच्या प्रदीर्घ कलाप्रवासाची आणि भारतीय चित्रपटसृष्टीतील योगदानाची दखल घेत ग्वाल्हेर येथील आयटीएम युनिव्हर्सिटीने त्यांना मानद डॉक्टरेट प्रदान केली आहे.
२१ नोव्हेंबर रोजी पार पडलेल्या विद्यापीठाच्या दीक्षांत समारंभात हा गौरव करण्यात आला. या सन्मानामुळे सचिन पिळगांवकर यांच्यावर चाहत्यांकडून अभिनंदनाचा वर्षाव होत आहे.
सचिन पिळगांवकरांना ‘डॉक्टर ऑफ लिटरेचर’ ही मानाची पदवी
आयटीएम युनिव्हर्सिटी, ग्वाल्हेरकडून सचिन पिळगांवकर यांना ‘डॉक्टर ऑफ लिटरेचर’ (D.Litt. Honoris Causa) ही मानद पदवी प्रदान करण्यात आली. विद्यापीठाच्या २१ नोव्हेंबर २०२६ रोजी झालेल्या ११व्या दीक्षांत समारंभात त्यांचा सन्मान करण्यात आला.
विशेष म्हणजे, विद्यापीठाने काही दिवसांपूर्वीच सोशल मीडिया पोस्टद्वारे सचिन पिळगांवकर यांना हा सन्मान देण्यात येणार असल्याची घोषणा केली होती. त्यानंतर आता प्रत्यक्ष सोहळ्यात त्यांना ही पदवी प्रदान करण्यात आली आहे.
सचिन पिळगांवकर यांचा हा सन्मान म्हणजे त्यांच्या सहा दशकांहून अधिक काळाच्या कलाप्रवासाची विशेष दखल मानली जात आहे. अभिनयासोबतच दिग्दर्शन, निर्मिती, लेखन आणि गायन अशा विविध क्षेत्रांत त्यांनी आपली स्वतंत्र ओळख निर्माण केली आहे. या विशेष सोहळ्याला सचिन पिळगांवकर यांच्या पत्नी आणि लोकप्रिय अभिनेत्री सुप्रिया पिळगांवकर यांचीही उपस्थिती होती.
विद्यापीठातील सन्मान सोहळ्यातील काही छायाचित्रे आणि व्हिडीओ सध्या सोशल मीडियावर चर्चेचा विषय ठरत आहेत. सचिन पिळगांवकर यांना मानद डॉक्टरेट मिळाल्याची बातमी समोर आल्यानंतर चाहत्यांसह अनेक कलाकार आणि नेटकऱ्यांनी त्यांचे अभिनंदन केले आहे.
दरम्यान, एक गोष्ट विशेष लक्षात घेण्यासारखी आहे. सचिन पिळगांवकर यांना मिळालेली ही वैद्यकीय क्षेत्रातील पदवी नसून त्यांच्या कलाक्षेत्रातील योगदानाबद्दल प्रदान करण्यात आलेली मानद डॉक्टरेट आहे. सहा दशकांहून अधिक काळ आपल्या कलेच्या जोरावर प्रेक्षकांच्या मनावर अधिराज्य गाजवणाऱ्या या ज्येष्ठ कलाकारासाठी हा सन्मान निश्चितच अभिमानास्पद ठरला आहे.






