Bangladesh : बांगलादेशात ३० घरे पेटवली.! आवामी लीगच्या नेते, कार्यकर्त्यांच्या मालमत्तांवर हल्ले
अग्निशामक दल गावात पोचले तेंव्हा २० ते ३० घरे पटवल्याचे आढळून आले. तर सत्तारुढ बीएनपीच्या कार्यकर्त्यांनी सुमारे ५० घरे आणि दुकानांची तोडफोड, लुटालूट आणि जाळपोळ केल्याचे गावकऱ्यांनी सांगितले.

Bangladesh – बांगलादेशात जाळपोळ आणि हिंसाचाराचे सत्र सुरू असून आवामी लीगचे नेते आणि कार्यकर्त्यांच्या घरांवर हल्ले करण्यात आले. राजकीय हिंसाचाराचे लोण देशाच्या अन्य भागात पसरल्यावर अशांत क्षेत्रात तैनात करण्यात आलेल्या सुरक्षा दलांची कुमक वाढवावी लागली आहे.
शुक्रवारी मध्यरात्रीच्या सुमारास कालिया उपजिल्ह्यातील बेंदरचार गावामध्ये आवामी लीगच्या कार्यकर्त्यांच्या घरांवर हल्ले झाले. यामध्ये काही घरे आणि दुकानांची तोडफोड आणि लुटालूट करण्याच आली. आवामी लीगचे माजी आमदार बीएम काबिरुल हक मुक्ती आणि कालिया महानगर पालिकेचे महापौर मुशफिकुर रहमान लिटन आणि पक्षाचे सरचिटणीस क्रिशनपदा घोष यांच्या घरांवर हल्ले झाले.
अग्निशामक दल गावात पोचले तेंव्हा २० ते ३० घरे पटवल्याचे आढळून आले. तर सत्तारुढ बीएनपीच्या कार्यकर्त्यांनी सुमारे ५० घरे आणि दुकानांची तोडफोड, लुटालूट आणि जाळपोळ केल्याचे गावकऱ्यांनी सांगितले. मात्र बीएनपीने हा आरोप फेटाळला आहे. मात्र माजी आमदारांच्या घराबरोबर ५ घरांची जाळपोळ झाल्याचे कालिया उपजिल्हा कार्यकारी अधिकाऱ्यांनी सांगितले.
या हल्ल्यांचा तपास सुरू असल्याचेही त्यांनी सांगितले. गेल्या आठवड्यातल्या हिंसाचारात ठार झालेल्या बीएनपीच्या कार्यकर्त्यांचे नातेवाईक शुक्रवारी बेंदारचुर भागात जमले आणि त्यांनीच आवामी लीगच्या नेत्यांच्या घरांवर हल्ले केल्याचेही त्यांनी सांगितले.
बीएनपीने १८ नोव्हंबर रोजी काढलेल्या मोटरसायकल रॅलीवर झालेल्या हल्ल्यामध्ये बीएनपीचे दोन नेते मारले गेले होते.
घटनास्थळी पोलिसांची कुमक पोचलीअसून आता अतिरिक्त पोलीस दल देखील पाठवून देण्यात आले आहे. आता
परिस्थिती नियंत्रणात असल्याचेही पोलिसांच्यावतीने सांगण्यात आले.
एका अन्य घटनेमध्ये गुरुवार रात्री ते शुक्रवार संध्याकाळच्या दरम्यान पटुआखाली येथे आवामी लीगच्या तीन माजी खासदारांच्या घरांवर हल्ला करून तोडफोड करण्यात आली. शनिवारी पाबना जिल्ह्यातील बेरा नगरपालिकेत बीएनपी आणि आवामी लीगच्या समर्थकांमध्ये संघर्ष उफाळून आला. सकाळी ११ वाजता सुरू झालेला संघर्ष दुपारपर्यंत सुरू होता. त्यामुळे पोलिसांना रबरी गोळ्या झाडून आणि अश्रुधुराच्या नळकांड्या फोडून जमावाला पांगवावे लागले.
माजी पंतप्रधान शेख हसीना यांनी मायदेशी परत येण्याची मागणी करत आवामी लीगने आठवड्याभराच्या आंदोलनाचे आवाहन केले आहे. याच आंदोलनादरम्यान जाळपोळ, क्रूड बॉम्ब फेकणे आणि अन्य हिंसक घटना घडल्या. हिंसाचाराच्या वेगवेगळ्या घटनांमध्ये आतापर्यंत ४ जण ठार झाले हेत.
निमलष्करी दलाच्या तुकड्या तैनात
कायदा आणि सुव्यवस्था राखण्यासाठी बॉर्डर गार्ड बांगलादेशच्या ९५ तुकड्या हिंसाचारग्रस्त जिल्ह्यांमध्ये तैनात करण्यात आल्या आहेत. गोपालगंज भागात बीजीबीची दोन बटालियन पाठवून दिल्या गेल्या आहेत.
गृह मंत्रालयाच्या निर्देशानुसार ढाका, नारायणगंज, गाजीपूर, गोपालगंज, मैमनसिंग, फरीदपूर आणि कॉक्स बाजार येथे कर्मचारी तैनात करण्यात आले असल्याचे बीजीबीच्या मुख्यालयाने प्रसिद्धीस दिलेल्या निवेदनात म्हटले आहे. प्रमुख औद्योगिक क्षेत्रातील महत्वाच्या ठिकाणची गस्त वाढवण्यात आली आहे. ड्रोन आणि बॉडी कॅमेऱ्यांच्या आधारे लाईव्ह मॉनिटरींग देखील केले जात आहे.





