Devendra Fadnavis : मुख्यमंत्री देवेंद्र फडणवीस (Devendra Fadnavis) यांनी मंगळवारी काँग्रेस नेते राहुल गांधी यांच्यावर भारताच्या घटनात्मक संस्थांबद्दल अविश्वास निर्माण करण्याचा प्रयत्न करत असल्याचा आरोप केला. निवडणूक आयोगाविरुद्धचे त्यांचे आंदोलन हे संविधानाला कमकुवत करण्याच्या कटकारस्थानाचा एक भाग असल्याचे त्यांनी म्हटले. फडणवीस (Devendra Fadnavis) हे मंत्रिमंडळाच्या बैठकीनंतर पत्रकारांशी बोलत होते.

फडणवीस म्हणाले, दररोज खोटे बोलून, भारताच्या घटनात्मक संस्था कोलमडल्या आहेत व त्या त्यांना न्याय देऊ शकत नाहीत, अशी धारणा लोकांच्या मनात निर्माण करून, त्यानंतर खुद्द संविधानाचाच त्याग करणे, असे हे कटकारस्थान सुरू आहे. हे आंदोलन त्याचाच एक भाग आहे. ते हातात संविधान घेतात आणि सर्व प्रकारची घटनाबाह्य कृत्ये करतात.

संविधान आणि घटनात्मक संस्थांबद्दल लोकांमध्ये नकारात्मकता निर्माण करणे हाच यामागचा उद्देश असल्याचा आरोप फडणवीस यांनी केला. त्यांना भारताच्या संविधानाचा त्याग करायचा आहे. लोकांच्या मनात संविधानाबद्दल नकारात्मकता निर्माण करायची आहे. अशा प्रकारचे हे आंदोलन चालवले जात आहे. या मोहिमेचा उद्देश अति-डाव्या विचारसरणीच्या सरकारसाठी मार्ग मोकळा करणे आणि लोकशाही संस्था कमकुवत करणे हा आहे.

अशा रचनेकडे वाटचाल करण्यामागचे कटकारस्थान म्हणजे भारतातील सर्व लोकशाही संस्था नष्ट करणे होय, असे फडणवीस (Devendra Fadnavis) म्हणाले. राहुल गांधी यांच्या नेतृत्वाखालील विरोधी पक्षांनी निवडणूक आयोगाविरुद्ध केलेले आंदोलन आणि मुख्य निवडणूक आयुक्त ज्ञानेश कुमार यांच्या राजीनाम्याची मागणी, या पार्श्वभूमीवर त्यांनी ही टिप्पणी केली.

विद्यार्थ्यांना वापरु नका : फडणवीस
विद्यार्थ्यांचा राजकीय हेतूने वापर करण्याच्या प्रयत्नांना राजकीय पातळीवरच प्रत्युत्तर दिले जाईल, मात्र विद्यार्थ्यांच्या रास्त समस्यांचे निवारण ठोस कृतीद्वारे केले जात आहे, असे फडणवीस यांनी सांगितले. आदिवासी विद्यार्थ्यांना मुंबईत ताब्यात घेतले गेले आणि त्यांना त्यांच्या समस्या मांडण्यापासून रोखले गेले, या काँग्रेसच्या आरोपांचा त्यांनी इन्कार केला.

मुंबई पोलीस हे एक व्यावसायिक दल आहे आणि ते नियमांनुसारच कारवाई करतात, असे फडणवीस (Devendra Fadnavis) यांनी ठामपणे सांगितले. विद्यार्थ्यांच्या समस्यांचा राजकीय फायद्यासाठी वापर करण्याबाबत सावध करतानाच, भाजपच्या नेतृत्वाखालील महायुती सरकार विद्यार्थ्यांच्या खऱ्या समस्या सोडवण्यासाठी १०० टक्के कटिबद्ध आहे आणि त्यादृष्टीने सरकारने आधीच निर्णय घेतले आहेत, यावर त्यांनी भर दिला.