Rahul Gandhi : नवी दिल्लीत निवडणूक आयोगाच्या विरोधात इंडिया ब्लॉकच्या खासदारांनी काढलेला मोर्चा मंगळवारी थांबवण्यात आला. संसदेतून निवडणूक आयोगाच्या मुख्यालयाकडे जाणाऱ्या खासदारांना पुढे जाऊ देण्यात आले नाही, त्यानंतर विरोधी पक्षनेते राहुल गांधी यांच्यासह सर्व खासदारांनी पार्लमेंट स्ट्रीटवर धरणे आंदोलन सुरू केले.

विरोधी पक्षाचे खासदार मुख्य निवडणूक आयुक्त ज्ञानेश कुमार यांच्या राजीनाम्याची आणि मतदार यादीतील विशेष सखोल सुधारणा (SIR) मागे घेण्याची मागणी करत आहेत. मतदार यादीतील बदलांदरम्यान अनियमितता झाल्याचा विरोधी पक्षाचा आरोप आहे.

लोकसभेतील विरोधी पक्षनेते राहुल गांधी यांच्यासह इंडिया ब्लॉकचे अनेक खासदार संसदेच्या मकर गेटपासून निवडणूक आयोगाच्या कार्यालयाकडे जाणाऱ्या मोर्चात सामील झाले.

मोर्चाच्या शक्यतेमुळे संसद आणि निवडणूक आयोगाच्या कार्यालयाभोवती सुरक्षा वाढवण्यात आली होती. मार्गावर अनेक ठिकाणी बॅरिकेड्स उभारण्यात आले होते आणि मोठ्या संख्येने सुरक्षा कर्मचारी तैनात करण्यात आले होते.

पोलिसांच्या माहितीनुसार, नवी दिल्ली जिल्ह्यात फौजदारी प्रक्रिया संहितेच्या (CrPC) कलम १६३ अंतर्गत कोणत्याही प्रकारच्या जमावाला प्रतिबंध करणारे आदेश लागू आहेत. निवडणूक आयोगाच्या मुख्य प्रवेशद्वाराजवळ आणि जंतर मंतरच्या परिसरात अनेक स्तरांवर बॅरिकेड्सही उभारण्यात आले आहेत.

१४० हून अधिक खासदार सहभागी होण्याची शक्यता Rahul Gandhi :

या मोर्चात इंडिया ब्लॉकचे सुमारे १४० विरोधी खासदार सहभागी होण्याची शक्यता होती. संसदेच्या मकर गेटपासून निवडणूक आयोगाच्या कार्यालयापर्यंतच्या मार्गावर निमलष्करी दलाच्या पाचपेक्षा जास्त कंपन्या आणि दिल्ली पोलिसांचे जवान तैनात करण्यात आले होते.

#WATCH | Delhi | “Vote Chor, Gaddi Chhod’ echoes through INDIA bloc’s protest march to the Election Commission of India https://t.co/Kf9yvjoEzZ

— ANI (@ANI) October 6, 2026

विरोधी पक्षांनी निवडणूक आयोगाविरोधात आपला विरोध अधिक तीव्र केला आहे. १ ऑक्टोबर रोजी इंडिया ब्लॉकने देशव्यापी आंदोलने, विरोधी खासदारांचा निवडणूक आयोगापर्यंत मोर्चा आणि १ नोव्हेंबर रोजी दिल्लीत एका मोठ्या रॅलीची घोषणा केली.

पाच दिवसांत ९ एफआयआर, १८ जणांना अटक Rahul Gandhi :
गेल्या पाच दिवसांत जंतर मंतरजवळील आंदोलनांच्या संदर्भात पोलिसांनी नऊ एफआयआर नोंदवले आहेत. यामध्ये मनाई हुकुमाचे उल्लंघन, दंगल आणि कर्तव्यावर असलेल्या पोलीस कर्मचाऱ्यांवर हल्ला करणे यांसारख्या कलमांचा समावेश आहे.

विरोधी पक्षांची आंदोलने २ ऑक्टोबरपासून सुरू आहेत. दरम्यान, या आठवड्याच्या शेवटी आणखी एका आंदोलनाचे आयोजन करण्यात आले आहे. कॉकरोच जनता पार्टीने (सीजेपी) १० ऑक्टोबर रोजी जंतर मंतर याठिकाणी आंदोलनाची घोषणा केली आहे. मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी देशव्यापी आंदोलनात हा पक्ष सहभागी होणार आहे.

ज्ञानेश कुमार यांच्या विरोधात विरोधी पक्षांच्या पदयात्रेच्या पार्श्वभूमीवर भारतीय जनता पक्षाने काँग्रेस पक्ष आणि राहुल गांधी यांना लक्ष्य केले आहे. भाजपचे प्रवक्ते संबित पात्रा म्हणाले की, त्यांचा पक्ष ज्ञानेश कुमार यांच्यामुळे नव्हे, तर बुद्धी, ज्ञान आणि बुद्धिमत्तेची देवता असलेल्या भगवान गणेशामुळे निवडणुका जिंकत आहे.