Delhi Elections – आगामी दिल्ली विधानसभा निवडणुकीसाठी भाजपने उमेदवारांची छाननी सुरू केली आहे. त्या पक्षाने अधिकाधिक नवे चेहरे मैदानात उतरवण्याचे संकेत दिले आहेत. दिल्लीत नववर्षातील फेब्रुवारीच्या मध्यात निवडणूक अपेक्षित आहे. त्यासाठी सर्वच प्रमुख पक्ष सज्ज होत आहेत. दिल्लीतील सत्तारूढ आपने विधानसभेच्या सर्व ७० जागांवरील उमेदवार याआधीच जाहीर केले आहेत. कॉंग्रेसनेही २१ उमेदवारांच्या नावांची घोषणा केली आहे. मात्र, उमेदवार निवडीच्या आघाडीवर भाजप त्या पक्षांपेक्षा पिछाडीवर पडला आहे. अर्थात, भाजपने उमेदवार निवडीची प्रक्रिया सुरू केल्याचे सूचित होत आहे. सध्या संसदेचे अधिवेशन सुरू आहे. ते २० डिसेंबरला समाप्त होईल. त्यानंतर पक्षाचे केंद्रीय नेतृत्व उमेदवार निवडीसाठी अंतिम फेरीच्या बैठका घेईल. सध्या उमेदवारांच्या छाननीची प्रक्रिया सुरू आहे. प्रत्येक जागेसाठी ३ संभाव्य उमेदवारांची नावे निश्चित करण्यात आली आहेत. याआधी पराभूत झालेल्या अनुभवी नेत्यांचा उमेदवारीसाठी विचार होण्याची शक्यता कमी आहे. पक्षाची अधिक भिस्त नव्या चेहऱ्यांवर राहण्याची शक्यता आहे. चालू महिन्याच्या अखेरीस उमेदवार निश्चित होतील. त्यांची नावे जाहीर करण्याची प्रक्रियाही सुरू होईल, अशी माहिती भाजपच्या सुत्रांनी दिली.
