Jahnavi Killekar Video – दहीहंडीच्या उत्साहात रंगलेल्या एका कार्यक्रमातील काही सेकंदांचा व्हिडीओ सध्या सोशल मीडियावर चांगलाच चर्चेचा विषय ठरत आहे. ‘बिग बॉस मराठी’ फेम अभिनेत्री जान्हवी किल्लेकर आणि सोशल मीडिया रील्समुळे लोकप्रिय झालेली प्रणाली सूर्यवंशी एकाच कार्यक्रमात उपस्थित असताना नेमकं असं काय घडलं की, जान्हवीचा नाराजीचा अंदाज कॅमेऱ्यात कैद झाला?

अँकरने प्रणाली सूर्यवंशीला माईकचा ताबा घेण्यास सांगितल्यानंतर जान्हवी काहीशी चिडल्याचं या व्हिडीओमध्ये दिसत असल्याने सोशल मीडियावर चर्चांना उधाण आलं आहे. या व्हिडीओवर आता अभिनेते किरण माने यांनी भाष्य केलं असून, त्यांच्या पोस्टमधून मराठी मनोरंजनविश्वातील बदलत्या समीकरणांवर थेट भाष्य करण्यात आलं आहे.

किरण माने यांनी आपल्या पोस्टमध्ये बदलत्या काळाचा संदर्भ देत म्हटलं आहे की, काही वर्षांपूर्वीपर्यंत मराठी सिनेमातील आणि टीव्हीवरील कलाकारांना सर्वात मोठे सेलिब्रिटी मानलं जायचं. मात्र, सोशल मीडियाच्या वाढत्या प्रभावामुळे हे चित्र आता झपाट्याने बदलत आहे.

त्यांनी लिहिलं की, ‘बदलत्या काळाची पावलं ओळखता यायला हवीत. पूर्वी अगदी चार वर्षांपूर्वीपर्यंत मराठीत सिनेमा-टीव्ही कलाकार म्हणजे सगळ्यात मोठे ‘सेलिब्रिटी’ मानले जायचे. आज ती जागा ‘रीलस्टार्स’ने घेतली आहे.’

नांदेड सिटीच्या दहीहंडी कार्यक्रमात आमच्या ‘बिग बॉस’ फेम जान्हवीपेक्षा लोकांना रीलस्टार प्रणाली सूर्यवंशीचं जास्त अप्रूप होतं हे एक प्रातिनिधिक उदाहरण! हे योग्य आहे की अयोग्य, या चर्चा होत राहतील.

कोण म्हणेल मराठी कलाकारांचा आणि कलाकृतीच्या विषयांचा सर्वसामान्य प्रेक्षकांच्या जगण्याशी ‘कनेक्ट’ नाही. कोण म्हणेल हल्ली जेन झी मराठी सिरियल सिनेमे बघतच नाही. कोण म्हणेल सुमारांची सद्दी…पण या चर्चा भाकड आहेत.

त्याने परिस्थिती बदलणार नाही. काळ बदलतोय. लोकांचे ‘चॉईसेस’ बदलतायत. विशेषतः मराठी टीव्ही-सिनेमाचं ग्लॅमर झाकोळलं गेलं आहे. कारणं अनेक असतील. पण जे आहे, ते आहे”, असं त्यांनी म्हंटलं आहे. सध्या किरण मानेंची ही पोस्ट चांगलीच व्हायरल झाली आहे.