Child Mortality Registration – बालमृत्यूचे प्रमाण पूर्णपणे रोखण्यासाठी आणि या संदर्भातील आकडेवारी अधिक अचूक करण्यासाठी राज्य सरकारने राज्यातील सर्व खासगी प्रसूतीगृहे, मॅटर्निटी होम, बाल रुग्णालये आणि मल्टिस्पेशालिटी हॉस्पिटल्समध्ये होणाऱ्या प्रत्येक बालमृत्यूची नोंद करणे बंधनकारक करण्यात आले आहे. केंद्र सरकारने शाश्वत विकास ध्येयानुसार सन २०३० पर्यंत नवजात बालक मृत्यूदर कमी करण्याचे उद्दिष्ट ठेवले आहे.

बालमृत्यू पूर्णपणे रोखण्यासाठी अचूक आकडेवारी असणे अत्यंत आवश्यक आहे. सार्वजनिक आरोग्य संस्थांमध्ये बालमृत्यूची नोंद अचूक होते, मात्र खासगी रुग्णालयांकडून यामध्ये निष्काळजीपणा होत असल्याचे समोर आले होते. हीच त्रुटी दूर करण्यासाठी सरकारने हा नवीन आदेश जारी केला आहे. खासगी क्षेत्रात झालेल्या कोणत्याही बालमृत्यूची माहिती २४ तासांच्या आत स्थानिक शासकीय आरोग्य केंद्राला कळवावी लागेल.

सर्व खासगी रुग्णालयांना केंद्र शासनाच्या आरोग्य व्यवस्थापन माहिती पद्धती प्रणालीवर मासिक अहवाल नोंदवावा लागेल. ज्या खासगी रुग्णालयांचे अद्याप मॅपिंग झालेले नाही, त्यांनी संबंधित जिल्हा आरोग्य अधिकारी, जिल्हा शल्य चिकित्सक किंवा महापालिकेच्या वैद्यकीय आरोग्य अधिकाऱ्यांकडून तातडीने युझर आयडी व पासवर्ड मिळवून घ्यायचा आहे, अशा सूचना शासनाने दिल्या आहेत.

नागरी नोंदणी प्रणाली आणि आरोग्य व्यवस्थापन माहिती पद्धती या दोन्ही डिजिटल प्लॅटफॉर्मवर अचूक आकडेवारी उपलब्ध झाल्यास प्रशासनाला सुधारणा करणे सोपे होणार आहे. बालमृत्यू नेमका कोणत्या कारणांमुळे होत आहे, याचे अचूक विश्लेषण करता येईल. संदर्भ सेवा व्यवस्थापनातील त्रुटी, उपचारांमधील अपुरेपणा आणि आरोग्य सेवेतील विलंब ओळखून तातडीने उपाययोजना करता येतील. वेळेत उपचार मिळाल्यामुळे अनेक बालकांचे प्राण वाचवणे शक्य होईल.