Chikhaldara News – चिखलदरा तालुक्यातील डोमा येथील शासकीय आदिवासी आश्रमशाळेतील विद्यार्थिनींमध्ये कथित भूतबाधेची भीती निर्माण झाल्यानंतर महाराष्ट्र अंधश्रद्धा निर्मूलन समितीने (अंनिस) तीन दिवस प्रबोधन व समुपदेशन केले. त्यानंतर घाबरलेल्या विद्यार्थिनींची भीती कमी झाली असून, त्यांनी पुन्हा शाळेत जाण्याची तयारी दर्शवली आहे.

अंनिसच्या नंदिनी जाधव, प्रा. प्रवीण देशमुख आणि रामभाऊ डोंगरे यांनी १० ऑगस्ट रोजी आश्रमशाळेला भेट देऊन मुख्याध्यापक, शिक्षक व कर्मचाऱ्यांशी चर्चा केली. विद्यार्थिनींच्या मनातील भीती समजून घेण्यासाठी पथकाने रात्री आश्रमशाळेत मुक्कामही केला. अंनिसच्या माहितीनुसार हा एक सामूहिक मानसिक प्रतिक्रियेचा (मास हेस्टेरिया) भाग होता. सुरुवातीला शाळेतील एका मुलीला मानसिक किंवा शारीरिक त्रास झाला.

तिला भुताने झपाटले या भीतीतून इतर मुलींमध्येही भीतीची साखळी पसरली. यामुळे मुलींमध्ये असंबद्ध बोलणे व हातवारे करणे अशा प्रतिक्रिया दिसून आल्या.
काही दिवसांपूर्वी मुलींनी ‘कांचना २’ सारखे भयपट पाहिले होते. त्यानंतर शाळेमध्ये चित्रपटाची चर्चाही झाली होती. त्यात आधीपासून असलेल्या अंधश्रद्धाळू समजुतींमुळे भयपटांमधील प्रतिमांचा मनावर खोल परिणाम झाला.

तसेच, आजारपण किंवा मानसिक त्रासासाठी वैद्यकीय मदतीऐवजी स्थानिक भूमकाकडे (भोंदू बुवा) जाण्याची प्रवृत्तीही अंधश्रद्धेला बळ देत असल्याचे समितीने म्हटले आहे. पथकाने विद्यार्थिनी राहत असलेल्या आदिवासी पाड्यांमध्ये जाऊन त्यांच्यांशी, पालकांशी संवाद साधला. त्यावेळी मुली सामान्य, स्वस्थ असल्याचे दिसले. आता त्या मनमोकळेपणाने बोलत असून, पुन्हा शाळेत जाण्याची त्यांनी इच्छा व्यक्त केल्याचे नंदिनी जाधव यांनी सांगितले.

अंधश्रद्धा केवळ अज्ञानातून नव्हे, तर भीती, अफवा आणि परंपरेतून जन्म घेते. त्यामुळे केवळ भूत नसते एवढे सांगून चालणार नाही, तर विद्यार्थी, पालक, शिक्षकांचे सातत्याने प्रबोधन करणे गरजेचे आहे, असे देशमुख, डोंगरे यांनी सांगितले. दरम्यान, आश्रमशाळांमधील जेवण, निवासाच्या सुविधांशी अनेक अडचणी असून, त्यात दुरुस्ती होणे आवश्यक असल्याचे जाधव यांनी नमूद केले.