Charholi News – चऱ्होलीतील प्राईड वर्ल्ड सिटी परिसरातील नागरिकांसाठी पाथरे वस्ती ते ताजणे चौक हा प्रमुख संपर्क मार्ग आहे. मात्र या रस्त्याची झालेली दुरवस्था आता नागरिकांच्या सहनशक्तीचा अंत पाहत आहे. मोठमोठे खड्डे, उघडे दगड आणि खराब झालेला डांबरी पृष्ठभाग यामुळे दररोज हजारो वाहनचालक आणि पादचाऱ्यांना जीव मुठीत धरून प्रवास करावा लागत आहे. चऱ्होली परिसरातील पाथरे वस्ती ते ताजणे चौक हा रस्ता सध्या गंभीर अवस्थेत असून नागरिकांच्या सुरक्षेचा प्रश्न ऐरणीवर आला आहे.

विशेषतः पुष्पानंद डेअरीजवळील सुमारे २०० मीटरचा रस्ता पूर्णपणे उखडला गेला आहे. या ठिकाणी मोठमोठे खड्डे पडले आहेत. अनेक ठिकाणी दगड वर आले आहेत. त्यामुळे वाहनचालकांना मोठी कसरत करावी लागत आहे. हा मार्ग प्राईड वर्ल्ड सिटीसह आसपासच्या अनेक गृहनिर्माण सोसायट्यांतील नागरिकांसाठी दैनंदिन वापराचा आहे. सकाळ आणि सायंकाळच्या वेळेत येथे मोठ्या प्रमाणावर वाहतूक असते. खराब रस्त्यामुळे वाहतुकीचा वेग मंदावतो. परिणामी कोंडी निर्माण होते.

दुचाकीस्वारांना विशेष त्रास सहन करावा लागत आहे. पावसाळ्यात परिस्थिती आणखी बिकट होते. खड्ड्यांमध्ये पाणी साचत असल्याने त्यांच्या खोलीचा अंदाज येत नाही. त्यामुळे अपघाताचा धोका वाढला आहे. अनेक वाहनांचे नुकसान होत असल्याच्या तक्रारी नागरिकांकडून करण्यात येत आहेत. महापालिका निवडणुकांच्या काळात या रस्त्याच्या दुरुस्तीची अनेक आश्वासने देण्यात आली होती. मात्र प्रत्यक्षात कोणतेही ठोस काम झाले नसल्याची खंत नागरिक व्यक्त करत आहेत.

स्थानिक लोकप्रतिनिधी आणि प्रशासनाने या प्रश्नाकडे गांभीर्याने पाहावे, अशी मागणी होत आहे. नागरिकांच्या सुरक्षिततेसाठी आणि वाहतूक सुरळीत करण्यासाठी संबंधित विभागाने तातडीने रस्त्याचे डांबरीकरण करावे. तसेच कायमस्वरूपी उपाययोजना करून या मार्गाची दुरवस्था दूर करावी, अशी मागणी जोर धरत आहे.