सांगली : राष्ट्रवादी काँग्रेस (शरदचंद्र पवार) पक्षाचे आमदार रोहित पवार यांनी सांगलीतील एका कार्यक्रमात भाजप आमदार गोपीचंद पडळकर यांच्यावर जोरदार टीकास्त्र सोडले. इस्लामपूर येथील महात्मा फुले शिक्षण संस्थेच्या प्रा. डॉ. एन. डी. पाटील विधी महाविद्यालय, श्रीमती सरोज नारायण पाटील (माई) मानसशास्त्र संशोधन केंद्र आणि प्रा. डॉ. एन. डी. पाटील बहुउद्देशीय सभागृहाच्या उद्घाटन सोहळ्यात बोलताना रोहित पवार यांनी पडळकरांना “बेन्टेक्सचे सोनं” संबोधत खालच्या पातळीवरील टीकेबद्दल खडसावले. याचवेळी त्यांनी उपमुख्यमंत्री अजित पवार यांनाही टोला लगावला आणि भाजप नेते चंद्रकांत पाटील यांचे कौतुक केले.

“बेन्टेक्सच्या सोन्याचं काय करायचं?”

रोहित पवार यांनी चंद्रकांत पाटील यांना उद्देशून सांगितले, “दादा, तुम्ही भाजपचे खरे सोनं आहात. तुम्ही अनेक वर्षे पक्षात प्रामाणिकपणे काम करत आहात. तुम्ही कोणत्याही विद्यार्थ्याचा किंवा सामान्य माणसाचा प्रश्न ऐकता आणि त्वरित फोन लावून तो सोडवता. तुम्ही राजकारणात राजकारण आणि समाजकारणात समाजकारण करता.

पण सध्या सांगली जिल्ह्यात काही बेन्टेक्सचे लोक फिरत आहेत, जे खालच्या पातळीवर जाऊन मोठ्या नेत्यांवर टीका करत आहेत. या बेन्टेक्सच्या सोन्याचं काय करायचं, हे तुम्हीच ठरवा!” या वक्तव्यातून त्यांनी गोपीचंद पडळकर यांच्यावर अप्रत्यक्षपणे निशाणा साधला. पडळकर यांनी यापूर्वी शरद पवार आणि रोहित पवार यांच्यावर सातत्याने टीका केली असून, सांगलीत त्यांच्या वक्तव्यांमुळे वाद निर्माण झाले आहेत.

भावकी विसरलात? अजित पवारांना टोला

रोहित पवार म्हणाले, “काही वर्षांपूर्वी माझ्या अधिवेशनातील भाषणानंतर अजितदादांचा फोन आला. मी विचार केला की, ते मला भाषण चांगलं झाल्याचं सांगतील. पण त्यांनी मला घरी बोलावून सांगितलं, ‘भाषण चांगलं झालं, पण शर्टाचं बटण वरपर्यंत लाव!’ इतक्या बारकाईने माझ्याकडे लक्ष होतं. पण आता ते गावकीचा विचार करतात आणि भावकी विसरले आहेत, असंही रोहित पवार म्हणाले.

राजकीय खेळाडूंची तुलना

रोहित पवार पुढे बोलताना म्हणाले, या व्यासपीठावर राजकारणातले मोठे खेळाडू आहेत. अजितदादा यॉर्कर टाकणारे फास्ट बॉलर आहेत, ज्यांच्या बॉलिंगला बॅट्समन घाबरतात. चंद्रकांतदादा मिडीयम पेस बॉलर आहेत, तर जयंत पाटील ऑफ स्पिन, लेग स्पिन आणि गुगली टाकतात. कधी कधी बॉल हातातच ठेवतात, पण बॅट्समनला वाटतं की त्यांनी बॉल टाकलाय. आम्ही नवखे खेळाडू, बॅट हातात घेऊन जमेल तसे खेळण्याचा प्रयत्न करतोय.” या वक्तव्यातून त्यांनी उपस्थित नेत्यांचे कौतुक करतानाच राजकीय रणनीतींची खिल्ली उडवली.