Chakan Rain Update – काल रात्रीपासून सुरू असलेल्या मुसळधार पावसामुळे चाकण शहर आणि परिसरातील जनजीवन पूर्णपणे विस्कळीत झाले आहे. अनेक सखल भागांमध्ये व रस्त्यांवर पाणी साचल्याने नागरिकांना मोठ्या अडचणींना तोंड द्यावे लागले. या पार्श्वभूमीवर चाकण नगर परिषदेच्या नगराध्यक्षा मनीषा गोरे व नगरसेवकांनी तातडीने शहरातील विविध पूरग्रस्त भागांची पाहणी करून परिस्थितीचा आढावा घेतला.

यावेळी राष्ट्रवादी काँग्रेस पक्षाचे (अजित पवार) गटनेते साहेबराव कड, विविध प्रभागांचे नगरसेवक, नगर परिषदेचे अधिकारी आणि कार्यकर्ते उपस्थित होते. या सर्वांनी पाणी साचलेल्या भागांना प्रत्यक्ष भेट देऊन नागरिकांशी संवाद साधला व त्यांच्या अडचणी जाणून घेतल्या. पाहणी दरम्यान अनेक ठिकाणी पावसाच्या पाण्याचा निचरा न झाल्याने रस्त्यांवर तळे साचल्याचे निदर्शनास आले. काही भागांमध्ये गटारे तुंबल्याने पाणी थेट नागरिकांच्या घरांत शिरले होते.

या परिस्थितीमुळे नागरिकांमध्ये तीव्र नाराजी असून, नगर परिषदेने पावसाळ्यापूर्वी केलेली नालेसफाई व जलनिस्सारणाची कामे केवळ कागदावरच राहिली का? असा प्रश्न उपस्थित केला जात आहे. गटनेते साहेबराव कड यांनीही प्रशासनाने आपत्कालीन परिस्थितीत तत्परतेने काम करण्याचे आवाहन केले. शहराचा वेगाने होत असलेला औद्योगिक विकास लक्षात घेता नैसर्गिक ओढे व नाल्यांमधील अडथळे दूर करून सक्षम जलनिस्सारण यंत्रणा उभी करण्याची गरज त्यांनी व्यक्त केली.

दरम्यान, नगर परिषद प्रशासनाने आपत्कालीन यंत्रणा सतर्क केली असून पूरग्रस्त भागांत कर्मचारी व यंत्रसामग्री तैनात केली आहे. नागरिकांनी सुरक्षिततेची काळजी घ्यावी आणि आवश्यकतेनुसार प्रशासनाशी संपर्क साधावा, असे आवाहन नगर परिषदेकडून करण्यात आले आहे. परिस्थितीची दखल घेत नगराध्यक्षा मनीषा गोरे यांनी संबंधित विभागाच्या अधिकाऱ्यांना पाणी साचलेल्या भागांमधून तातडीने पाण्याचा निचरा करण्याचे आणि तुंबलेली गटारे साफ करण्याचे आदेश दिले. तसेच भविष्यात अशी परिस्थिती उद्भवू नये म्हणून कायमस्वरूपी नियोजन करण्यात येईल, अशी ग्वाही त्यांनी दिली.