Junnar Municipal Council – नगराध्यक्ष आणि नगरसेवकांमध्ये असलेल्या मतभेदांमुळे जुन्नर नगरपरिषदेचा कारभार सुरळीतपणे होत नसल्याची चर्चा शहरात रंगू लागली आहे. मागील सहा महिन्यांच्या कालावधीत नगराध्यक्ष, सत्ताधारी आणि विरोधी नगरसेवक यांच्यातील वादांमुळे नगरपरिषदेच्या कामकाजावर मोठा परिणाम होवून शहराच्या धोरणात्मक विकासाला खिळ बसली आहे. त्यामुळे निवडून दिलेल्या नगरसेवकांच्या कामकाजावर नागरिकांकडून तीव्र नाराजी व्यक्त होत आहे.

जुन्नर नगरपरिषदेची सर्वसाधारण सभा मंगळवार (दि.३० जून) रोजी दुपारी एक वाजता आयोजित केली होती. मात्र लोकनियुक्त नगराध्यक्षा सुजाता काजळे यांचा कारभार हा मनमानी पद्धतीचा असल्याचा आरोप करीत सत्ताधाऱ्यांसह विरोधी नगरसेवकांनी सभेला दांडी मारल्याचे सत्ताधारी शिवसेना व शिवजन्मभूमी विकास मंच गटप्रमुख विक्रम परदेशी यांनी सांगितले.

नगरसेवक विक्रम परदेशी यांनी, नगराध्यक्षा सुजाता काजळे यांचा कारभार हा मनमानी पद्धतीचा आहे. नगराध्यक्षांचे पती मधुकर काजळे हे पत्नीच्या पदाचा दुरुपयोग करून नगरपरिषदेच्या प्रशासकीय कामकाजात हस्तक्षेप करत आहेत. शहराच्या सर्वांगीण विकासाच्या दृष्टीने सर्वसाधारण सभेमध्ये कोणताही विकासकामाचा मुद्दा चर्चेत घेतला जात नाही.

तसेच नगरपरिषदेच्या अधिकारी व कर्मचाऱ्यांना विनाकारण वेठीस धरून प्रशासकीय कामकाजात अडथळा निर्माण केला जात असल्याने सत्ताधारी शिवसेना व शिवजन्मभूमी विकास मंच गटाच्या नगरसेवकांनी या सभेला गैरहजर राहण्याचे ठरविले होते., असे सांगितले. विरोधी, जुन्नर शहर विकास आघाडीच्या गटनेत्या वैष्णवी पांडे यांनी सांगितले की, जुन्नर नगरपरिषदेच्या प्रशासकीय कामकाजामध्ये मोठ्या प्रमाणावर दिरंगाई होत आहे.

त्याचा फटका जुन्नर शहरातील सर्वसामान्य नागरिकांना बसत असून अनेक दिवसांपासून प्रलंबित असलेले प्रश्न अद्याप सुटलेले नाही. यापूर्व काळात विकासकामांचे जे ठराव केलेले आहेत, त्याबाबत कोणत्याही स्वरूपाची प्रशासकीय कार्यवाही अद्यापपर्यंत झालेली नाही. प्रशासकीय कामकाजामध्ये असलेल्या दिरंगाईच्या निषेधार्थ या सभेस हजर राहण्याचे टाळल्याचे पांडे यांनी सांगितले.

भाजपाचे नगरसेवक अनिल रोकडे यांनी सांगितले की, नगराध्यक्षांच्या कारभार हा एक कलमी कार्यक्रम आहे. अद्यापपर्यंत विषय समिती देखील स्थापन करण्यात आलेली नाही, याच्या निषेधार्थ सभेला गैरहजर राहिलो. दरम्यान याबाबत नगराध्यक्षा सुजाता काजळे यांनी सविस्तर प्रतिक्रिया दिली. त्यांनी दिलेल्या माहितीनुसार, सर्वसाधारण सभेत एकूण अकरा विषयांवर चर्चा होणार होती.

यामध्ये कुशल, अकुशल व अर्धकुशल कर्मचाऱ्यांच्या ठेकेदारावर कडक कारवाई करून त्यांना ब्लॅक लीस्ट करणे, शहरातील हायमॅक्स दिवे व सोलर पॅनल या विषयांमध्ये नगर परिषदेची आर्थिक फसवणूक केल्याप्रकरणी संबंधित ठेकेदारावर जुन्नर पोलीस स्टेशनच्या आलेल्या पत्रानुसार विचार विनिमय करून निर्णय घेणे, तसेच समाजमाध्यमांत बिनबुडाचे आरोप करत शहराची दिशाभूल करून नगरपरिषदेची प्रतिमा मलीन होत असल्याने याबाबत कारवाई करण्यासाठी त्रिस्तरीय सदस्य समिती स्थापन करण्याबाबत चर्चा करून निर्णय घेणे, हे प्रमुख विषय समाविष्ट होते.

दरम्यान या विषयांबाबत मुख्याधिकारी यांनी दिशाभूल करणारी टिपण्णी नगरसेवकांना आदल्या दिवशी सायंकाळी सातनंतर दिली होती. तर, या तिन्ही विषयांमध्ये सभेत चर्चा होऊ नये, तसेच यातील काही प्रकरणे अंगलट येतील म्हणून काही सदस्य गैरहजर राहिले होते. तसेच नगराध्यक्षांवरील आरोप हे बिनबुडाचे असून अर्धवट ज्ञानापोटी केले असल्याचे काजळे यांनी सांगितले.