Cable Theft Case – तांबवे धरण परिसरातून चोरीस गेलेल्या तांब्याच्या केबल प्रकरणाचा लोणंद पोलिसांनी अवघ्या काही दिवसांत छडा लावत एका संशयिताला अटक केली आहे. या कारवाईत चोरीस गेलेली केबल आणि गुन्हा करण्यासाठी वापरण्यात आलेली मोटारसायकल असा एकूण ८४ हजार रुपयांचा मुद्देमाल जप्त करण्यात आला आहे. तांबवे (ता. फलटण) येथील धरण परिसरात बसविण्यात आलेली तांब्याची केबल अज्ञात व्यक्तीने चोरून नेल्याची घटना काही दिवसांपूर्वी घडली होती.

या चोरीमुळे धरण परिसरातील यंत्रणेच्या सुरक्षेबाबतही प्रश्नचिन्ह निर्माण झाले होते. याप्रकरणी संभाजी दाजीराम धायगुडे यांनी लोणंद पोलीस ठाण्यात तक्रार दाखल केल्यानंतर पोलिसांनी अज्ञात चोरट्याविरोधात गुन्हा नोंदवला होता. जिल्हा पोलीस अधीक्षक कार्यालयाच्या मार्गदर्शनाखाली सहाय्यक पोलीस निरीक्षक शिवाजी जायपत्रे यांच्या नेतृत्वाखाली तयार केलेल्या विशेष पथकाने घटनास्थळाची पाहणी, तांत्रिक तपास आणि मिळालेल्या माहितीच्या आधारे संशयिताचा माग काढला. एका संशयिताला ताब्यात घेत चौकशी केली असता त्याने चोरीची कबुली दिली.

पोलिसांनी संशयिताकडून चोरीस गेलेली सुमारे २४ हजार रुपये किमतीची तांब्याची केबल हस्तगत केली. तसेच चोरीच्या गुन्ह्यात वापरण्यात आलेली मोटार सायकल (एमएच ०९ बीएच ३४७३) जप्त केली. जप्त मालाची एकूण किंमत सुमारे ८४ हजार रुपये असल्याचे पोलिसांनी सांगितले. सहाय्यक पोलीस निरीक्षक शिवाजी जायपत्रे, सहाय्यक पोलीस फौजदार विष्णू धुमाळ, हवालदार लता निकम, पोलीस नाईक सिद्धेश्वर वाघमोडे, बापूराव मदने, कॉन्स्टेबल अंकुश कोळेकर, अमोल जाधव आणि अवधूत धुमाळ यांनी या कारवाईत सहभाग घेतला.