Cab vs Auto Comparison- रिक्षाचा प्रवास महाग आणि त्याच मार्गावर एसी कारचा प्रवास स्वस्त, असे अजब चित्र सध्या खासगी ॲग्रीगेटर ॲपवर दिसत आहे. रिक्षाच्या मीटर दरात झालेल्या भाडेवाढीनंतर ओला, उबेर आणि रॅपिडोसारख्या ॲपवर रिक्षाचे भाडे वाढले. मात्र, कारच्या भाड्यात तुलनेने फारशी वाढ झाली नाही. त्यामुळे अनेक मार्गांवर रिक्षापेक्षा कारचे भाडे ५० ते १०० रुपयांनी कमी दिसत आहे.

परिणामी, प्रवासी रिक्षाऐवजी आरामदायी आणि वातानुकूलित कारला पसंती देत आहेत. या बदलाचा थेट परिणाम शहरातील रिक्षाचालकांच्या व्यवसायावर झाला आहे. सीएनजीचे वाढते दर, महागलेले स्पेअर पार्ट्स आणि देखभालीचा वाढता खर्च लक्षात घेऊन रिक्षा संघटनांनी भाडेवाढीची मागणी केली होती. त्यानुसार प्रादेशिक परिवहन कार्यालयाने (आरटीओ) १ सप्टेंबरपासून रिक्षाच्या मीटर दरात वाढ केली.

भाडेवाढ लागू झाल्यानंतर रिक्षाचालकांना दिलासा मिळेल, अशी अपेक्षा होती. मात्र, ॲपवरील भाड्याच्या गणितामुळे हीच दरवाढ आता रिक्षाचालकांसाठी अडचणीची ठरत आहे.
खासगी ॲपवर प्रवासाचे भाडे पाहिल्यानंतर ग्राहकांना रिक्षापेक्षा कार स्वस्त पडत असल्याचे दिसून येत आहे. चिंचवडगाव ते पुणे स्टेशन या मार्गासाठी रिक्षाचे भाडे ३६८ रुपये, तर कारचे भाडे २९४ रुपये आहे.

म्हणजेच कारने आरामदायी प्रवास केल्यास ७४ रुपयांची बचत होते. चिंचवडगाव ते कात्रज या मार्गावर ही बचत ९१ रुपयांपर्यंत आहे. पैशांची बचत होत असतानाच कारमध्ये एसीची सुविधा मिळते. धूर, धूळ आणि उन्हाचा त्रास कमी होतो. त्यामुळे अनेक प्रवासी रिक्षाऐवजी कार बुक करत आहेत. विशेषतः कुटुंबासह प्रवास करणारे ग्राहक कारला अधिक पसंती देत असल्याचे रिक्षाचालक सांगतात.

मीटर आणि ॲपच्या भाड्यातही संभ्रम
ॲपवरील भाडे आणि प्रत्यक्ष रिक्षाच्या मीटरप्रमाणे आकारले जाणारे भाडे यामध्येही तफावत आहे. त्यामुळे प्रवासी आणि रिक्षाचालक यांच्यात अनेकदा वाद होतात. ॲपवर ठरलेले भाडे एक आणि मीटरवर वेगळे भाडे दिसल्याने ग्राहकांमध्ये संभ्रम निर्माण होतो. या प्रकारामुळे काही प्रवासी रिक्षा प्रवास टाळून थेट कार बुक करण्याचा पर्याय निवडतात.

डिजिटल स्पर्धेत प्रामाणिक चालक भरडले
ॲपआधारित रिक्षा व्यवसायात आणखी एक गंभीर समस्या रिक्षाचालकांसमोर उभी राहिली आहे. काही चालकांकडून ‘ऑटो क्लिकर’ किंवा तत्सम सॉफ्टवेअरचा वापर केला जात असल्याचा आरोप आहे. अशा पद्धतीमुळे जास्त अंतराची किंवा अधिक भाड्याची भाडी मिळविण्यात काही चालकांना फायदा होत असल्याचे सांगितले जाते. त्यामुळे नियमांचे पालन करून व्यवसाय करणाऱ्या चालकांना भाडे मिळण्यासाठी बराच वेळ प्रतीक्षा करावी लागते.