ST Bus Breakdown- इंदापूर-बारामती मार्गावर धावणाऱ्या लालपरीच्या अडचणी थांबण्याचे नाव घेत नसल्याचे चित्र पुन्हा एकदा समोर आले आहे. रस्त्यात एसटी बस बंद पडण्याच्या घटना ताज्या असतानाच, आता वाहकाचे (कंडक्टर) तिकीट मशीन बंद पडल्याचे कारण देत प्रवाशांना भररस्त्यात खाली उतरवण्यात आल्याचा धक्कादायक प्रकार भवानीनगर येथील शेरपुलाजवळ घडला आहे. यामुळे प्रवाशांमधून तीव्र संताप व्यक्त होत आहे.

माहितीनुसार, इंदापूर आगाराची बारामती-इंदापूर बस दुपारी ३:३० वाजेच्या सुमारास बारामतीवरून इंदापूरकडे निघाली होती. भवानीनगर येथील शेरपुलाजवळ येताच वाहकाजवळील तिकीट मशीन अचानक तांत्रिक बिघाडामुळे बंद पडले आणि त्यातून तिकिटाची पावती येणे बंद झाले. लिमटेक व काटेवाडी येथून चढलेल्या प्रवाशांची तिकिटे काढायची शिल्लक असल्याने चालकाने बस थेट रस्त्याच्या कडेला थांबवली. मशीन चालत नसल्याचे कारण सांगत सर्व प्रवाशांना चालकाने व वाहकाने अर्ध्या रस्त्यातच खाली उतरवले.

इंदापूर-बारामती मार्गावर नेहमीच गाड्या नादुरुस्त होऊन बंद पडण्याचे प्रमाण वाढले आहे. अनेकदा यावर आवाज उठवूनही एसटी महामंडळ किंवा परिवहन विभाग याकडे गांभीर्याने पाहत नाही. तिकीट मशीन बंद पडल्यास प्रवाशांना रस्त्यात उतरवणे हा कसला न्याय? प्रशासनाने या लालपरीच्या दुरवस्थेकडे लक्ष देऊन कायमस्वरूपी सुधारणा करावी, अशी जोरदार मागणी संतप्त प्रवाशांनी केली आहे.

प्रवाशांना रस्त्यावर ताटकळण्याची वेळ
गाव येण्यापूर्वीच तब्बल एक ते दीड किलोमीटर आधी प्रवाशांना उतरवण्यात आल्याने वृद्ध, महिला आणि नोकरदारांचे मोठे हाल झाले. कामावर किंवा नियोजित स्थळी वेळेवर पोहोचण्याच्या घाईत असणाऱ्या प्रवाशांना इतर वाहनांची वाट पाहत तासन्‌तास उन्हात उभे राहावे लागले. एसटीचा प्रवास, सुखाचा प्रवास हे ब्रीदवाक्य गाड्यांवर लिहिले असले, तरी प्रत्यक्षात मात्र प्रवाशांच्या नशिबी या मार्गावर नेहमीच हाल सोसावे लागत आहेत.