Breaking News – सध्या राज्यभर गणेशोत्सवाचा उत्साह शिगेला पोहोचला आहे. ढोल-ताशांचा गजर, बाप्पाच्या आगमनाची लगबग, आकर्षक सजावट आणि भव्य मिरवणुकांनी शहरा-शहरांमध्ये उत्सवी वातावरण निर्माण झालं आहे. मात्र, या उत्साहासोबतच दरवर्षी ऐरणीवर येणारा ध्वनिप्रदूषणाचा मुद्दाही यंदा चांगलाच तापला आहे.

गणेशोत्सवात डीजे, डॉल्बी आणि लाऊडस्पीकरच्या कर्णकर्कश आवाजावर नियंत्रण आणावं, अशी मागणी विविध स्तरांतून होत असतानाच नागपूर पोलिसांनी थेट कठोर निर्णय घेतला आहे.

नागपूरकरांसाठी मोठी बातमी म्हणजे आज, ३ सप्टेंबरच्या रात्रीपासून शहरात डीजेचा दणदणाट थांबणार आहे. नागपूरचे पोलीस आयुक्त विश्वास नांगरे पाटील यांनी आगामी सण-उत्सवांच्या पार्श्वभूमीवर डीजे, डीजे लावलेली वाहने, हाय-पॉवर साऊंड सिस्टिम तसेच बीम आणि लेझर लाईट्सच्या वापरावर निर्बंध घातले आहेत. हे निर्बंध १ नोव्हेंबर २०२६ पर्यंत लागू राहणार आहेत.

नागपुरात नेमकी कशावर बंदी?

पोलीस आयुक्त विश्वास नांगरे पाटील यांच्या आदेशानुसार उत्सव आणि मिरवणुकांच्या काळात मोठ्या आवाजाच्या साऊंड सिस्टिमचा वापर करणाऱ्या डीजे वाहनांवरही कारवाई होणार आहे. डॉल्बी, मल्टी-स्पीकर, प्लाझ्मा किंवा प्रेशर-हॉर्नवर आधारित अत्यंत मोठ्या आवाजाच्या साऊंड सिस्टिमच्या वापरावरही निर्बंध घालण्यात आले आहेत.

संबंधित डीजे सिस्टिम बसवण्यासाठी करण्यात आलेल्या वाहनांमध्ये बदल करून त्या वापरात आणू नयेत, असेही निर्देश देण्यात आल्याचे वृत्त आहे. याशिवाय बीम लाईट आणि लेझर बीम लाईटवरही निर्बंध घालण्यात आले आहेत.

अशा तीव्र प्रकाशामुळे वाहनचालकांच्या दृष्टीवर परिणाम होऊन अपघाताचा धोका निर्माण होऊ शकतो, तसेच सार्वजनिक सुरक्षिततेचा प्रश्न निर्माण होऊ शकतो, अशी पोलिसांची भूमिका आहे.

नियम मोडल्यास कारवाईचा इशारा

गणेशोत्सव, मिरवणुका आणि आगामी सणांच्या पार्श्वभूमीवर हा आदेश देण्यात आला असून सार्वजनिक शांतता, नागरिकांची सुरक्षितता, वाहतूक व्यवस्था आणि ध्वनिप्रदूषण नियंत्रण यांचा विचार करण्यात आला आहे. आदेशाचे उल्लंघन करणाऱ्या मंडळांवर, आयोजकांवर किंवा संबंधित व्यक्तींवर नियमानुसार कठोर कारवाई करण्याचा इशारा पोलिसांनी दिला आहे.

दरम्यान, डीजेऐवजी ढोल-ताशे, बँड, संदल आणि भजन यांसारख्या पारंपरिक पद्धतींचा वापर करण्याचे आवाहन पोलिस प्रशासनाकडून करण्यात आले आहे. त्यामुळे यंदाच्या गणेशोत्सवात नागपूरमध्ये ‘आवाजाची ताकद’ दाखवण्याऐवजी पारंपरिक पद्धतीने उत्सव साजरा करण्यावर भर द्यावा लागणार आहे.

पुण्यातही डीजेच्या मुद्द्यावरून वातावरण तापलं

एकीकडे नागपुरात पोलिसांनी डीजे आणि हाय-पॉवर साऊंड सिस्टिमवर निर्बंध घातले असताना दुसरीकडे पुण्यातही डीजे आणि ध्वनिप्रदूषणाचा मुद्दा चर्चेच्या केंद्रस्थानी आला आहे. पुण्यातील नागरिक विद्यानंद बापट यांनी गणेशोत्सवातील डीजे, डॉल्बी आणि कर्णकर्कश लाऊडस्पीकरच्या वापराला विरोध करत डीजेमुक्त गणेशोत्सवाची मागणी केली आहे.

पुणे महापालिकेच्या नियोजन बैठकीत त्यांनी ही मागणी मांडली. मोठ्या आवाजामुळे नागरिकांना होणारा त्रास आणि ध्वनिप्रदूषणाचा प्रश्न लक्षात घेऊन सार्वजनिक उत्सवांमध्ये आवाजावर नियंत्रण आणण्याची गरज असल्याचे त्यांचे म्हणणे आहे.