नाशिक : २१ डिसेंबरला राज्यातील नगरपरिषदा आणि नगरपंचायत निवडणुकांचा निकाल जाहीर होणार आहे. या निकालानंतर मतदार राज्याने कोणाच्या पारड्यात मतदानाचा कौल दिला आहे, हे स्पष्ट होणार आहे. गेल्या काही दिवसांपूर्वीच राज्य निवडणूक आयोगाने २९ महापालिका निवडणुकांचा निवडणूक कार्यक्रम जाहीर केला. यासाठी १५ जानेवारी २०२६ रोजी मतदान, तर दुसऱ्याच दिवशी १६ जानेवारी २०२६ रोजी निकाल जाहीर होणार आहे. या पार्श्वभूमीवर महापालिका क्षेत्रात जोरदार हालचाली सुरू झाल्या आहेत. भाजपकडून या निवडणुकीसाठी मोठी यंत्रणा राबवली जात आहे. या निवडणुकीसाठी निवडणूक प्रमुखांची निवड करण्यात आली असून, इच्छूक उमेदवारांच्या मुलाखती घेतल्या जात आहेत. पण सार काही सुरळीत सुरू असतानाच भाजपाने पुन्हा एकदा धक्कातंत्राचा अवलंब केला असून, यामुळे सर्वांच्याच भुवया उंचावल्या आहेत. महापालिका निवडणुकीच्या पार्श्वभूमीवर नाशिकमध्ये भाजपने धक्कातंत्र देत निवडणूक प्रमुखपदावरून आमदार अॅड राहुल ढिकले यांना हटवले आहे. त्यांच्या जागी आता आमदार देवयानी फरांदे यांच्यावर ही जबाबदारी सोपविण्यात आली आहे. या अचानक करण्यात आलेल्या नियुक्तीमुळे भाजपमध्ये असलेला अंतर्गत संघर्ष चव्हाट्यावर आला असून, यामुळे आता गटतटाचे राजकारण उफाळून येण्याची शक्यता व्यक्त केली जात आहे. या बदलामुळे भाजपपुढे निवडणूक काळातच गटातटाच्या राजकारणाचे मोठे आव्हान उभे राहू शकते. निर्णयाचे कारण काय? गेल्या काही दिवसांपासून आमदार अॅड राहुल ढिकले स्वतः इच्छूक उमेदवारांच्या मुलाखती घेत होते. सर्व काही ठरल्याप्रमाणे सुयोग्य पद्धतीने सुरू होते. मात्र, अचानक घेतलेल्या या निर्णयामुळे ढिकले यांना धक्का बसला आहे. भाजपच्या राजकीय खेळीने सर्वांनाच आश्चर्यचकित केले आहे. आमदार राहुल ढिकले हे नाशिक पूर्व विधानसभा मतदार संघाचे प्रतिनिधित्व करतात. तर देवयानी फरांदे या मध्य नाशिक मतदार संघातून आमदार म्हणून निवडून आलेल्या आहेत. मिळालेल्या माहितीनुसार, फरांदे यांची निवड त्यांच्याकडे असलेला दांडगा जनसंपर्क आणि संघटन बांधनीचा असलेला अनुभव पाहता करण्यात आली आहे. पण अचानक घेण्यात आलेल्या निर्णयाचे नेमके कारण काय आहे याबाबत माहिती मिळू शकलेली नाही. हेही वाचा : बांगलादेश पुन्हा पेटलं! शरीफ उस्मान हादी यांच्या मृत्यूनंतर उसळली संतापाची लाट
