Bishnoi Gang – एअरपोर्ट रोडवरील एक बांधकाम व्यावसायिक, कुटूंबियांना ठार मारण्याची धमकी देत टायसन बिष्णोई टोळीच्या नावे पाच कोटींची खंडणी मागितल्याचा प्रकार समोर आला आहे. याप्रकरणी, ५० वर्षीय व्यावसायिकाने दिलेल्या फिर्यादीनुसार विमानतळ पोलिस ठाण्यात खंडणीचा गुन्हा दाखल झाला आहे. हा प्रकार १२ ते १४ ऑगस्ट दरम्यान घडला . या काळात व्यावसायिकाला घरी, ऑफिसमध्ये, तसेच मुलगा आणि त्यांच्या भावाला फोन टोळीने फोन केला.

पोलिसांच्या माहितीनुसार, आरोपीने फिर्यादी व्यावसायिकांच्या मोबाइलवर फोन केले. सुरूवातीला त्यांनी त्याकडे दुर्लक्ष केले. सतत फोन येत असल्यामुळे त्यांनी तो फोन उचचला, त्यावेळी समोरील व्यक्तीने आपण राजस्थानमधून बोलत असून आपले नाव टायसन बिष्णोई असल्याचे सांगितले. तसेच आपणाला पाच कोटींची खंडणी हवी असल्याचे सांगितले. त्याने फिर्यादींना त्यांचे नातेवाईक, ओळखीतील व्यक्ती, व्यवसायाच्या जागांची नावे घेऊन धमकावले.

खंडणी दिली नाही तर कुटूंबातील व्यक्तींना गोळी मारण्याची धमकी दिली. तसेच पाचच्या जागी पंधरा किंवा वीस करोड खंडणी द्यावी लागेल. असेही म्हटले. फिर्यादींना त्यांच्या भागिदारांची नावे सांगितली. त्यांची सर्व रेकी करण्यात आल्याचे आरोपीने सांगितले. मेसेजद्वारेही आरोपीने फिर्यादींना खंडणीसाठी धमकाविले आहे. सतत खंडणीसाठी येणाऱ्या धमकीच्या फोनमुळे फिर्यादींनी अखेर गुन्हे शाखेच्या खंडणी विरोधी पथकाकडे धाव घेत तक्रार दिली.

त्यानुसार विमानतळ पोलिसांनी आरोपीविरुद्ध खंडणीचा गुन्हा दाखल केला आहे. दरम्यान, गेल्या काही दिवसापुर्वी फुरसुंगी परिसरातील एका व्यावसायिकाच्या गोडाऊनवर आरजू बिष्णोई टोळीने गोळीबार करत खंडणीची मागणी केली होती. त्यातील काही आरोपींना गुन्हे शाखेच्या पथकाने अटक केली. आता परत टायसन बिष्णोईच्या नावाने व्यावसायिकाला पाच कोटीच्या खंडणीसाठी धमकाविण्यात आले आहे.