Bihar Lok Sabha Election 2024 – बिहारच्या सिवान लोकसभा मतदार संघाची निवडणूक रंगतदार अवस्थेत पोहोचली आहे. अपक्ष उमेदवार हिना शहाब यांनी राष्ट्रीय जनता दलाचे नेते तेजस्वी यादव यांच्या अडचणी वाढवल्या आहेत. हिना यांचे पती मोहम्मद शाहबुद्दीन हे एकेकाळी लालू प्रसाद यादव यांचे अत्यंत निकटवर्तीय मानले जात. सिवान येथून त्यांचा अनेक वेळा विजय झाला आहे. मात्र आता त्यांच्या पत्नी हिना येथे अपक्ष म्हणून रिंगणात उतरल्या आहेत.
शाहबुद्दीनचा बिहारच्या राजकारणावर बराच प्रभाव होता. खासकरून मुस्लिम मतदारांवर त्यांची मोठी पकड होती. त्याकाळी सिवान आणि आजूबाजूच्या परिसरातीलच नव्हे तर संपूर्ण बिहारमधील मुसलमान शाहबुद्दीन यांच्या नावावर राष्ट्रीय जनता दलाला मतदान करायचे. तथापि, २०२१ मध्ये शाहबुद्दीन याच्या निधनानंतर समीकरणे बदलली आहेत.
त्यांचे कुटुंब आणि राष्ट्रीय जनता दलातील अंतर वाढले आहे. दिल्लीच्या तिहार येथील तुरूंगात शिक्षा भोगत असलेल्या शाहबुद्दीनच्या निधनानंतर त्याच्या दफनविधी वेळी लालू अथवा त्यांच्या कुटुंबातील कोणीही सदस्य उपस्थित राहीले नव्हते. मात्र त्यानंतर ऑक्टोबर २०२१ मध्ये शाहबुद्दीन याचा मुलगा ओसामा शहाब याच्या विवाह सोहळ्यात तेजस्वी यादव सहभागी झाले होते.
आता शाहबुद्दीनची पत्नी हिना सिवान येथून रिंगणात आहे. त्यांनी तीन वेळा म्हणजे २००९, २०१४ आणि २०१९ मध्ये राजदच्या तिकिटावर येथून निवडणूक लढवली होती, मात्र त्यांचा पराभव झाला होता. मागच्या निवडणुकीत त्यांना ३३ टक्के म्हणजे जवळपास साडेतीन लाख मते मिळाली होती.
राजदची अडचण ही आहे की सिवानमध्ये मुसलमानांची लोकसंख्या मोठी आहे. मतदार संघात ३ लाख मुस्लिम, अडीच लाख यादव आणि सव्वा लाख कुशवाहा, ४ लाख सवर्ण, अडीच लाख ईबीसी मतदार आहेत. जातीच्या समीकरणांमुळे ही लढत तिरंगी झाली तर राजदलाच त्याचा फटका बसणार आहे.
