पुणे : येत्या दोन-तीन महिन्यांत स्थानिक स्वराज्य संस्थांच्या निवडणुका जाहीर होण्याची शक्यता आहे. या पार्श्वभूमीवर राज्याच्या गृह विभागाने पोलिस दलात मोठ्या प्रमाणात फेरबदलांचा धडाका लावला आहे. गुरुवारी जारी करण्यात आलेल्या आदेशानुसार, बीड, लातूर, अमरावतीसह विविध जिल्ह्यांतील १५ सहाय्यक पोलिस आयुक्तांच्या बदल्या करण्यात आल्या असून, अनेक वरिष्ठ अधिकाऱ्यांना नव्या जबाबदाऱ्या सोपवण्यात आल्या आहेत.

महत्त्वाच्या नियुक्त्या आणि बदल्या

– सुधीर हिरेमठ : गुन्हे अन्वेषण विभागाच्या पोलिस महानिरीक्षकपदी नियुक्ती.
– मच्छिंद्र रमाकांत पंडीत : सोलापूर मुख्यालयातील पोलीस उपअधीक्षकपदावरून सहाय्यक पोलिस आयुक्तपदी बढती.
– मधुलिका महेशकुमार ठाकूर : मुंबईतील नागरी हक्क संरक्षण विभागातील पोलीस उपअधीक्षकपदावरून नागपूर येथील नागरी हक्क संरक्षण विभागात पोलीस उपअधीक्षक म्हणून नियुक्ती.

१५० हून अधिक अधिकाऱ्यांना पदोन्नती

काही दिवसांपूर्वी राज्य सरकारने १५० हून अधिक पोलिस अधिकाऱ्यांच्या पदोन्नतीचे आदेश जारी केले होते. यामध्ये सहाय्यक पोलिस आयुक्त, पोलिस उपअधीक्षक आणि उपविभागीय पोलिस अधिकारी यांच्या पदांचा समावेश आहे. मुंबई, ठाणे, पुणे आणि सोलापूर शहरांतील अनेक अधिकाऱ्यांना या पदोन्नतीचा लाभ मिळाला. याशिवाय, ३५ सहाय्यक पोलिस आयुक्तांच्या बदल्याही करण्यात आल्या आहेत.

भंडाऱ्यात प्रशासकीय बदल

पोलिस दलाबरोबरच भंडारा जिल्ह्यातही महत्त्वाचा प्रशासकीय फेरबदल झाला आहे. जिल्हाधिकारी डॉ. संजय कोलते यांची बदली करण्यात आली असून, त्यांच्या जागी नंदुरबार जिल्हा परिषदेचे मुख्य कार्यकारी अधिकारी सावन कुमार (भाप्रसे) यांची भंडाऱ्याच्या नव्या जिल्हाधिकारीपदी नियुक्ती करण्यात आली आहे.