Maharashtra Electricity : देशभरात विजेच्या मागणीत वाढ; महाराष्ट्रातही वीज पुरवठ्याचे आव्हान
महाराष्ट्रात ऑक्टोबरमध्ये आतापर्यंतची सर्वोच्च म्हणजे ३३ हजार ६२५ मेगावॅट इतकी विजेची विक्रमी मागणी नोंदविली गेली.

Maharashtra Electricity – देशातील विजेची मागणी वेगाने वाढत असून चालू आर्थिक वर्षाच्या एप्रिल ते ऑक्टोबर या पहिल्या सात महिन्यांत गेल्या वर्षाच्या तुलनेत ११.७ टक्क्यांची वाढ नोंदविण्यात आली आहे. वाढते औद्योगीकरण, व्यावसायिक वापर, वातानुकूलन यांमुळे संपूर्ण आर्थिक वर्षात विजेची मागणी सुमारे ८.५ टक्क्यांनी वाढण्याचा इक्राचा अंदाज आहे.
या पार्श्वभूमीवर महाराष्ट्रात मार्च २०२७ मध्ये सुमारे दोन हजार मेगावॅट विजेची तूट निर्माण होण्याची शक्यता असून ती भरून काढण्याचे मोठे आव्हान महावितरणसमोर असेल. सौर ऊर्जेवर भर देत मागणी-पुरवठ्याचे गणित साधण्याकरिता विजेच्या बॅटरी साठवणुकीवर महावितरणचा भर असेल.
इक्राच्या अहवालानुसार, देशातील विजेच्या मागणीत एप्रिल ते ऑक्टोबर २०२६ या काळात ११.७ टक्क्यांची वाढ झाली. नोव्हेंबरच्या पहिल्या ११ दिवसांतही मागणी मागील वर्षाच्या तुलनेत १२.९ टक्क्यांनी वाढली. संपूर्ण आर्थिक वर्षात देशातील विजेची मागणी सुमारे ८.५ टक्क्यांनी वाढण्याचा इक्राचा अंदाज आहे.
वाढते तापमान, औद्योगिक उत्पादन आणि व्यावसायिक क्षेत्रातील विजेचा वापर ही मागणीवाढीमागील प्रमुख कारणे आहेत. त्यामुळे औष्णिक वीजनिर्मितीसाठी कोळशाचा पुरेसा साठा राखणे आणि वाढत्या मागणीनुसार वीज उपलब्ध करून देणे ही देशापुढील आव्हाने असल्याचेही अहवालातून स्पष्ट होते.
महाराष्ट्रात ऑक्टोबरमध्ये आतापर्यंतची सर्वोच्च म्हणजे ३३ हजार ६२५ मेगावॅट इतकी विजेची विक्रमी मागणी नोंदविली गेली. राज्यात मार्च २०२७ मध्ये सर्वोच्च मागणी ३६ हजार ८५८ मेगावॅटपर्यंत जाण्याचा अंदाज केंद्रीय विद्युत प्राधिकरणाने व्यक्त केला आहे.
त्या तुलनेत वीज उपलब्धता ३४ हजार ७२१ मेगावॅट राहण्याची शक्यता असल्याने सुमारे २,१३७ मेगावॅटची तूट निर्माण होऊ शकते. ही संभाव्य तूट आणि संध्याकाळच्या वाढत्या मागणीचा सामना करण्यासाठी महावितरणने बॅटरी ऊर्जा साठवणूक प्रकल्पांवर भर दिला आहे.






