Satej Patil : कोल्हापूर जिल्हा सहकारी दूध उत्पादक संघ अर्थात गोकुळच्या निवडणुकीनंतर आता अध्यक्षपदाच्या निवडीकडे सर्वांचे लक्ष लागले आहे. सतेज पाटील यांच्या नेतृत्वाखालील समविचारी पॅनेलने १३ संचालक निवडून आणत यश मिळवले आहे. मात्र, अध्यक्ष निवडीसाठी आवश्यक संख्याबळ आणि कोरम याबाबत तांत्रिक पेच निर्माण झाला आहे. त्यामुळे संचालक मंडळात बहुमत मिळवूनही अध्यक्षपदाची निवड कशी होणार, हा प्रश्न उपस्थित केला जात आहे.

सतेज पाटील यांची हसन मुश्रीफांशी चर्चा

गोकुळच्या अध्यक्षपदाच्या निवडीवर तोडगा काढण्यासाठी राजकीय हालचाली सुरू झाल्या आहेत. याबाबत बोलताना सतेज पाटील यांनी हसन मुश्रीफ यांच्याशी फोनवर चर्चा झाल्याची माहिती दिली. मुश्रीफ यांच्या कार्यकर्त्यांचा फोन आल्यानंतर आपण त्यांच्याशी संवाद साधला, असे पाटील यांनी सांगितले.

“राजकारण हे निवडणुकीपुरते असते,” अशी भूमिका मांडत त्यांनी अध्यक्ष निवडीसाठी सहकार्य मिळण्याची अपेक्षा व्यक्त केली. हसन मुश्रीफ, विनय कोरे आणि चंद्रदीप नरके यांच्याशी चर्चा झाल्याचेही त्यांनी सांगितले.

महायुतीचे नेते फडणवीसांची भेट घेणार?

दरम्यान, गोकुळच्या अध्यक्षपदाबाबत महायुतीच्या नेत्यांमध्येही चर्चा सुरू असल्याची माहिती सूत्रांकडून मिळत आहे. महायुतीचे नेते मुख्यमंत्री देवेंद्र फडणवीस यांची भेट घेऊन त्यांचा सल्ला घेण्याची शक्यता वर्तवली जात आहे.

आज मुंबईत होणाऱ्या राज्य मंत्रिमंडळाच्या बैठकीनंतर ही भेट होऊ शकते. गोकुळच्या अध्यक्षपदासाठी महायुतीकडून उमेदवार देण्याबाबतही चाचपणी सुरू असल्याची माहिती आहे.

२९ ऑक्टोबरला अध्यक्षपदाची निवड

गोकुळच्या नवनिर्वाचित संचालकांकडून येत्या २९ ऑक्टोबरला अध्यक्षाची निवड केली जाणार आहे. निवडणुकीत सत्ता मिळवता न आलेल्या महायुतीकडून अध्यक्षपदाच्या निवडीत कोणती भूमिका घेतली जाते, हे महत्त्वाचे ठरणार आहे.

सतेज पाटील यांच्या नेतृत्वाखालील पॅनेलला अध्यक्ष निवडीसाठी आवश्यक पाठिंबा मिळतो का, महायुतीचे नेते सहकार्य करतात का, की स्वतंत्र उमेदवार मैदानात उतरवला जातो, यावर गोकुळमधील पुढील राजकीय समीकरणे अवलंबून असतील.

Maharashtra Vidhan Parishad Result 2026 : आठ मतपेट्यांना सीलच नाही; पुणे पदवीधर मतदारसंघाच्या मतमोजणी केंद्रावर गोंधळ