Maharashtra Politics : काँग्रेस पक्ष सोडून इतर पक्षांत गेलेले देशातील पाच माजी मुख्यमंत्री पुन्हा काँग्रेसमध्ये परतणार असल्याच्या चर्चांना राजकीय वर्तुळात उधाण आले आहे. यामध्ये महाराष्ट्राचे माजी मुख्यमंत्री अशोक चव्हाण यांच्या नावाचाही समावेश असल्याची चर्चा आहे.

या चर्चांना वेग आला असतानाच काँग्रेसचे ज्येष्ठ नेते नाना पटोले यांनी यावर प्रतिक्रिया दिली आहे. ते म्हणाले “अशोक चव्हाण यांच्याबाबत राज्यातील काँग्रेस कार्यकर्त्यांमध्ये तीव्र नाराजी आहे. मात्र, चव्हाण यांच्यासह अन्य नेत्यांच्या पक्षप्रवेशाबाबत अंतिम निर्णय काँग्रेसचे वरिष्ठ नेतृत्वच घेईल.”

नाना पटोलेंचा मोठा दावा

देशातील बदलत्या राजकीय परिस्थितीमुळे अनेक नेते पुन्हा काँग्रेसच्या मूळ प्रवाहात येण्यास इच्छुक असल्याचा मोठा दावाही नाना पटोले यांनी केला आहे. त्यामुळे आगामी काळात पक्षात कोणाची घरवापसी होणार, याकडे राजकीय वर्तुळाचे लक्ष लागले आहे.

२०२४ मध्ये आघाडीचे सरकार सत्तेवर येणार होते.

२०२४ च्या महाराष्ट्र विधानसभा निवडणुकीत महाविकास आघाडीचे सरकार सत्तेवर येणार होते, असा खळबळजनक दावाही नाना पटोले यांनी केला आहे. निवडणुकीच्या काळात काँग्रेसचे ७५, तर महाविकास आघाडीचे एकूण १६० आमदार निवडून येतील, असा अहवाल इंटेलिजन्स ब्युरोने (IB) सरकार आणि विरोधकांना दिला होता, असे त्यांनी म्हटले. अकोला जिल्ह्यातील बाळापूर तालुक्यातील वाडेगाव येथे धम्मचक्र प्रवर्तन दिनानिमित्त आयोजित सभेत ते बोलत होते.