Maharashtra Politics : भाजपने स्थानिक स्वराज्य संस्थांच्या निवडणुकीसाठी जोरदार मोर्चाबांधणी सुरू केली आहे. अनेक भागांत ‘ऑपरेशन लोटस’ राबवलं जात असल्याची माहिती समोर आली असून, सोलापूरमध्ये मंत्री जयकुमार गोरे, तर इतर भागांमध्ये मंत्री राधाकृष्ण विखे पाटील सक्रिय झाले आहेत.

याच दरम्यान, राष्ट्रवादी काँग्रेस (शरद पवार गट) ला मोठा धक्का बसण्याची शक्यता वर्तवली जात आहे. शरद पवार गटाचे युवक जिल्हाध्यक्ष अमित भांगरे यांनी थेट मंत्री राधाकृष्ण विखे पाटील यांची भेट घेतल्याने राजकीय चर्चांना उधाण आलं आहे.

भेटीमुळे चर्चांना उधाण

मिळालेल्या माहितीनुसार, अमित भांगरे, त्यांच्या आई सुनीता भांगरे यांच्यासह, शिर्डी येथील शासकीय विश्रामगृहात बंद दरवाजामागे विखे पाटलांसोबत चर्चा करताना दिसले. यावेळी भाजपचे माजी आमदार वैभव पिचड देखील उपस्थित होते. विशेष म्हणजे, ही भांगरे-विखे पाटील यांची पंधरवड्यातील दुसरी भेट होती.

जिल्हा परिषद निवडणुकीत ‘भांगरे’ भाजपकडे वळणार?

आगामी जिल्हा परिषद निवडणुकीच्या पार्श्वभूमीवर या घडामोडींना विशेष महत्त्व प्राप्त झालं आहे. अहिल्यानगर जिल्ह्यातून सुनीता भांगरे यांची उमेदवारीची शक्यता, तसेच अनुसूचित जमाती महिलांसाठी आरक्षित असलेलं अध्यक्षपद लक्षात घेता, भांगरे कुटुंब भाजपकडे झुकतंय का, असा प्रश्न उपस्थित झाला आहे.

भाजप प्रवेशाची शक्यता वाढली

अमित भांगरे यांनी याआधी शरद पवार गटाकडून विधानसभा निवडणूक लढवली होती. त्यामुळे त्यांचा भाजपमध्ये जाण्याचा निर्णय शरद पवारांसाठी मोठा धक्का ठरू शकतो. सध्या राजकीय वर्तुळात भांगरे लवकरच भाजपमध्ये प्रवेश करतील, अशी जोरदार चर्चा सुरु आहे.