Bhumkar Chowk Accident – रस्त्याच्या कडेला नादुरुस्त दुचाकी सुरू करण्याचा प्रयत्न करणाऱ्या दोन भावांना भरधाव टेम्पोने धडक दिली. या अपघातात एका 18 वर्षीय तरुणाचा मृत्यू झाला. हा भीषण अपघात मंगळवारी (दि. 24 मार्च) दुपारी दोन वाजण्याच्या सुमारास मुंबई-बेंगलोर हायवेवरील भूमकर चौक ब्रिजवर घडला. समीर राजू तलकेरी (वय 18) असे मृत्यू झालेल्या तरुणाचे नाव आहे. या अपघाताप्रकरणी लक्ष्मण अशोक तलकेरी (वय 24, रा. जेपीनगर, किरकटवाडी, सिंहगड रोड) यांनी मंगळवारी (दि. २४ मार्च) रोजी हिंजवडी पोलीस ठाण्यात फिर्याद दिली आहे. पोलिसांनी टाटा इंट्रा टेम्पो चालक सागर नवनाथ खांडेकर (वय 22, रा. हिंगणे म्हसवड, माण, जि. सातारा) याच्या विरोधात गुन्हा दाखल केला आहे. पोलिसांनी दिलेल्या माहितीनुसार, फिर्यादी आणि त्यांचा भाऊ दुचाकी भरून मुंबई बेंगलोर महामार्गावरून जात होते. भुमकर चौक ब्रिज येथे आल्यानंतर त्यांची दुचाकी बंद पडली. रस्त्याच्या बाजूला दुचाकी थांबवून दुचाकी सुरू करण्याचा लक्ष्मण हे प्रयत्न करीत होते. फिर्यादी लक्ष्मण हे गाडीला किक मारत होते. तर त्यांचा भाऊ समीर हा गाडीचा रेस करीत होता. रेस करत असताना समीर याला एका टेम्पोने धडक दिली. या अपघातात समीर याचा मृत्यू झाला. तर दुचाकीचेही मोठ्या प्रमाणावर नुकसान झाले आहे. हिंजवडी पोलीस याबाबत अधिक तपास करत आहेत.
