Bhor Municipal Council – भोर नगरपरिषदेची सर्वसाधारण सभा मंगळवारी (दि.३०) घेण्यात आली होती. परंतु या दिवशी नगराध्यक्षांनी भाजपच्या नगरसेविका यांना एकेरी उल्लेख करून अपमानास्पद भाषा वापरल्याने गदारोळ झाला. दुसऱ्या दिवशीही बुधवारी सर्वसाधारण सभा भरवण्यात आली होती. यावेळी पुन्हा राष्ट्रवादीचे नगरसेवक व भाजपचे नगरसेवक यांच्यात शाब्दिक चकमक झाल्याने सभागृहात गदारोळ झाला.

दोन्ही पक्षातील नगरसेवकांना शांत करण्यासाठी मुख्याधिकारी गजानन शिंदे व नगराध्यक्ष रामचंद्र आवारे यांना व्यासपीठ सोडून खाली उतरावे लागले. भोर नगरपरिषदेच्या सभागृहात मंगळवारी सर्वसाधारण सभा आयोजित केली होती. भाजपच्या महिला नगरसेविका प्रभागातील प्रश्न मांडत असताना नगराध्यक्षांनी त्यांचा एकेरी उल्लेख करून अपमानास्पद भाषा वापरली, यामुळे गदारोळ झाला.

महिला नगरसेविकांनी नगराध्यक्षांच्या निषेधाच्या घोषणा देत माफीची मागणी केली. सुरुवातीला नगराध्यक्षांनी हात जोडून माफी मागितली, मात्र नगरसेविकांचे समाधान न झाल्याने त्यांनी लेखी माफीनाम्याचा आग्रह धरला. सभेच्या दुसऱ्या सत्रात आवारे यांनी लेखी स्वरूपात दिलगिरी व्यक्त केली. दुसऱ्या दिवशीही बुधवारी सर्वसाधारण सभा भरवण्यात आली होती.

यादरम्यान राष्ट्रवादीच्या एका नगरसेवकाकडून भाजपच्या नगरसेविका यांना अर्वाच्य भाषेत बोलल्याने राष्ट्रवादी व भाजपच्या नगरसेवकांमध्ये शाब्दिक चकमक झाली. यावेळी सभागृहात तणावाचे वातावरण निर्माण झाले होते. यावेळी दोन्ही पक्षाच्या नगरसेवकांना शांत करण्यासाठी मुख्याधिकारी गजानन शिंदे व नगराध्यक्ष रामचंद्र आवारे यांना व्यासपीठ सोडून नगरसेवकांना शांत करावे लागले.

नागरिकांकडून विकासाची अपेक्षा
भोर नगरपरिषदेत भाजपाचे निवडून आलेले १६ नगरसेवक व २ स्वीकृत नगरसेवक, असे एकूण १८ नगरसेवक आहेत. तर राष्ट्रवादीचे ४ नगरसेवक व नगराध्यक्ष कार्यरत आहेत. दोन्ही पक्षातील नगरसेवकांमध्ये मतभेद होत असल्याने भोर शहरातील विकासकामाला अडथळा निर्माण होत आहे. भोरच्या विकासासाठी आपले मतभेद दूर ठेवून नागरिकांचा विचार करीत भोरचा विकास साधावा, अशी प्रतिक्रिया भोरमधील नागरिकांकडून उमटत आहे.