BCCI Announces WPL 2027 Schedule Starting January 14 Final In Mumbai : महिला प्रीमियर लीगच्या (WPL) आगामी पाचव्या हंगामाबाबत भारतीय क्रिकेट नियामक मंडळाने (BCCI) मोठी घोषणा केली आहे. बीसीसीआयने डब्ल्यूपीएलचे २०२७ चे अधिकृत वेळापत्रक जाहीर केले असून, ही बहुप्रतिक्षित स्पर्धा १४ जानेवारी ते ७ फेब्रुवारी २०२७ या कालावधीत रंगणार आहे. यंदाच्या मोसमातील सर्व २२ सामने वडोदरा आणि मुंबई या दोन शहरांमध्ये खेळवले जाणार आहेत. नुकताच कोची येथे पार पडलेल्या रंगतदार लिलावानंतर आता पाचही संघ जेतेपदाच्या लढतीसाठी मैदानात उतरण्यास सज्ज झाले आहेत.

पहिल्याच सामन्यात आरसीबी विरुद्ध मुंबई इंडियन्स भिडणार

स्पर्धेचा पहिला टप्पा १४ जानेवारीपासून वडोदरा येथे सुरू होणार आहे. उद्घाटनाच्या पहिल्याच लढतीत गतविजेता संघ रॉयल चॅलेंजर्स बंगळुरू (RCB) आणि माजी विजेता संघ मुंबई इंडियन्स (MI) आमनेसामने येतील. वडोदरा येथे १४ ते २४ जानेवारी दरम्यान एकूण ११ सामने खेळवले जातील. दोन्ही संघांमधील पारंपरिक चुरस पाहता पाचव्या हंगामाची सुरुवात अत्यंत धमाकेदार होणार आहे.

मुंबईत रंगणार बाद फेऱ्यांचा थरार; ब्रेबॉर्न स्टेडियमवर एलिमिनेटर

🥁 Mark your calendars, folks 🗓️

#TATAWPL 2027 fixtures are out with defending champions @RCBTweets and @mipaltan kicking things off in Vadodara 🥳

Which match are you looking forward to the most? 🤔 https://t.co/plbt6PLPFj

— Women’s Premier League (WPL) (@wplt20) November 4, 2026

वडोदरा येथील सामने संपल्यानंतर स्पर्धेचा दुसरा टप्पा २६ जानेवारीपासून मुंबईतील ऐतिहासिक ब्रेबॉर्न स्टेडियमवर सुरू होईल. मुंबईमध्ये उर्वरित ११ सामने पार पडतील, ज्यामध्ये ३ फेब्रुवारीपर्यंत साखळी फेरीच्या लढती चालतील. गुणतालिकेत अव्वल स्थानी राहणारा संघ थेट अंतिम फेरीत पोहोचेल, तर दुसऱ्या आणि तिसऱ्या क्रमांकावरील संघांमध्ये ५ फेब्रुवारी रोजी ‘एलिमिनेटर’चा महामुकाबला खेळवला जाईल.

हेही वाचा – Rajkumari Wushu Medal : राजकुमारी लांचेनबी चानूने यूथ ऑलिम्पिकमध्ये रचला इतिहास; वुशू खेळात भारताला जिंकून दिले पहिले पदक

७ फेब्रुवारीला महाअंतिम सामना; संध्याकाळी रंगणार लढती –

डब्ल्यूपीएलचे २०२७ चा महाअंतिम सामना ७ फेब्रुवारी रोजी रविवारी मुंबईच्या ब्रेबॉर्न स्टेडियमवर खेळवला जाईल. बीसीसीआयच्या वेळापत्रकानुसार, प्लेऑफसह सर्व २२ सामने भारतीय वेळेनुसार संध्याकाळी ७:३० वाजता सुरू होतील. महिला क्रिकेटमधील मातब्बर खेळाडूंच्या उपस्थितीत रंगणाऱ्या या स्पर्धेत स्मृती मानधनाच्या नेतृत्वाखाली आरसीबी आपला किताब राखण्यासाठी मैदानात उतरेल.