Bank Fraud – जमिनीवरील कर्जाचा बोजा कमी करून देण्याचे आमिष दाखवून आणि बँकेचा बनावट शिक्का वापरून ३३ लाख रुपयांची आर्थिक फसवणूक केल्याचा धक्कादायक प्रकार राजणगाव गणपती येथे उघडकीस आला आहे. या प्रकरणी राजणगाव एमआयडीसी पोलिसांनी दोघांविरुद्ध फसवणूक आणि बनावट कागदपत्रे तयार केल्याप्रकरणी गुन्हा दाखल केला असून या घटनेमुळे परिसरात मोठी खळबळ उडाली आहे. फिर्यादी संदीप खेडकर (रा. खेडकर वस्ती, राजणगाव गणपती) यांनी दिलेल्या तक्रारीनुसार, आरोपी हनुमंत दगडू खेडकर (रा. केसनंद, पुणे) आणि गणेश संतोष लोखंडे (रा. खेडकर वस्ती, राजणगाव गणपती) यांनी संगनमताने हा कट रचला. फिर्यादींच्या जमिनीवर बँकेचे कर्ज असल्याने ते कमी करून देतो, असे सांगून आरोपींनी त्यांच्याकडून ३३ लाख रुपये उकळले. त्यानंतर बँकेचा अधिकृत भासवणारा बनावट शिक्का मारलेले ना हरकत प्रमाणपत्र (NOC) फिर्यादींना देण्यात आले. मात्र, बँकेत पडताळणी केली असता सदर कागदपत्रे आणि शिक्का पूर्णतः बनावट असल्याचे समोर आले. तपासात असे निष्पन्न झाले आहे की, आरोपींनी घेतलेली ३३ लाखांची रक्कम कर्ज खात्यात जमा न करता ती इतर विविध बँक खात्यांमध्ये वळवली. कर्जाचा बोजा कमी करण्याच्या नावाखाली आधीच आखलेला हा फसवणुकीचा डाव होता हे स्पष्ट झाले आहे. या घटनेमुळे जमीन व्यवहारांमधील विश्वासार्हतेवर प्रश्नचिन्ह निर्माण झाले असून नागरिकांमध्ये भीतीचे वातावरण आहे. पोलिसांनी या प्रकरणी फसवणूक, विश्वासघात आणि बनावट दस्तऐवज तयार करणे अशा गंभीर कलमांखाली गुन्हा दाखल केला आहे. या गुन्ह्यात अन्य कोणाचा सहभाग आहे का, याचा शोध सध्या घेतला जात आहे. पोलीस निरीक्षक महादेव वाघमोडे यांच्या मार्गदर्शनाखाली पोलीस उपनिरीक्षक गुलाबराव येळे या प्रकरणाचा पुढील तपास करत आहेत. दरम्यान, कोणत्याही मोठ्या आर्थिक व्यवहारापूर्वी संबंधित बँक किंवा अधिकृत कार्यालयात जाऊन स्वतः खात्री करण्याचे आवाहन पोलिसांनी केले आहे.
