India Badminton Bronze : भारतीय पुरुष बॅडमिंटन संघाने रचला इतिहास! ४० वर्षांनंतर सलग दुसऱ्यांदा कोरलं पदकावर नाव
India Badminton Bronze : भारतीय पुरुष बॅडमिंटन संघाचा आशियाई क्रीडा स्पर्धा २०२६ पर्यंतचा प्रवास उपांत्य फेरीत पदक जिंकून संपला. भारतीय खेळाडूंनी चीनविरुद्ध जोरदार झुंज दिली, पण अंतिम फेरीसाठी पात्र ठरण्याकरिता त्यांना १-३ ने पराभव पत्करावा लागला.
Asian Games 2026 India Mens Badminton Team Wins Bronze Medal Lost Semifinal To China : जपानमधील नागोया येथे सुरू असलेल्या आशियाई क्रीडा स्पर्धा २०२६ (Asian Games 2026) मध्ये भारतीय पुरुष बॅडमिंटन संघाचे सुवर्णपदकाचे स्वप्न हुकले असून संघाला कांस्यपदकावर (Bronze Medal) समाधान मानावे लागले आहे. बुधवारी, २३ सप्टेंबर रोजी खेळल्या गेलेल्या उपांत्य फेरीच्या अटीतटीच्या लढतीत बलाढ्य चीनने भारताचा ३-१ असा पराभव करत अंतिम फेरीत प्रवेश केला. मात्र, या पराभवानंतरही भारतीय संघाने आशियाई स्पर्धेत तब्बल ४० वर्षांनंतर सलग दोन स्पर्धांमध्ये सांघिक पदक जिंकण्याचा नवा ऐतिहासिक पराक्रम आपल्या नावावर केला आहे.
४० वर्षांनंतर ऐतिहासिक कामगिरी; सात्विक-चिरागची जागतिक चॅम्पियनवर मात!
भारताने यापूर्वी १९८२ आणि १९८६ च्या आशियाई क्रीडा स्पर्धेत सलग कांस्यपदके जिंकली होती. त्यानंतर २०२३ च्या हांगझोऊ स्पर्धेत रौप्य आणि आता २०२६ मध्ये कांस्य पटकावून भारताने चार दशकांनंतर या ऐतिहासिक कामगिरीची पुनरावृत्ती केली आहे. या उपांत्य लढतीत भारतासाठी एकमेव विजय सात्विकसाईराज रंकीरेड्डी आणि चिराग शेट्टी या जोडीने मिळवून दिला. त्यांनी पॅरिस ऑलिम्पिक रौप्यपदक विजेत्या व विद्यमान जागतिक चॅम्पियन लियांग वेई केंग आणि वांग चांग या जोडीला २१-११, २२-२० असे सरळ गेममध्ये नमवून बरोबरी साधली होती.
लक्ष्य सेन आणि आयुष शेट्टीचा पराभव; चीनने घेतली २-१ ची आघाडी!
Bronze for Team India! 🥉🇮🇳
History repeated in the best way possible as the Indian men’s badminton team secured back-to-back medals at the Asian Games after 40 years! 🏸✨ pic.twitter.com/yQKNCAwuQl
— BAI Media (@BAI_Media) September 23, 2026
पहिल्या एकेरीच्या लढतीत भारताचा स्टार खेळाडू लक्ष्य सेनला जागतिक क्रमवारीत सहाव्या स्थानी असलेल्या शी यू क्यूईविरुद्ध १६-२१, १८-२१ असा पराभव पत्करावा लागला. सात्विक-चिरागने सामना १-१ असा बरोबरीत आणल्यानंतर तिसऱ्या सामन्यात युवा आयुष शेट्टीकडून मोठ्या आशा होत्या. मात्र, चीनच्या ली शी फेंगने आयुषचा २१-१९, २१-१३ असा पराभव करत चीनला २-१ अशी भक्कम आघाडी मिळवून दिली.
हरिहरन-अर्जुन जोडीची झुंज अपुरी; भारताला कांस्यपदक!
Bronze Medal Secured! 🥉🇮🇳
Huge congratulations to the Indian Men’s Badminton Team on bringing home the Bronze at the 20th Asian Games!
Incredible effort and spirit shown on the court by the whole squad 🏸🔥 pic.twitter.com/4pgBwJN5hr
— BAI Media (@BAI_Media) September 23, 2026
चौथ्या लढतीत भारताच्या हरिहरन अम्साकरुणन आणि एम. आर. अर्जुन या जोडीवर संपूर्ण मदार होती. त्यांनी दुसऱ्या गेममध्ये जोरदार पुनरागमन केले; मात्र निर्णायक तिसऱ्या गेममध्ये चीनच्या हे जी टिंग आणि लियू यी जोडीने वर्चस्व गाजवत सामना २१-१६, १७-२१, २१-९ असा जिंकला. यासह चीनने ३-१ ने अंतिम फेरी गाठली, तर भारताने कांस्यपदकासह आपली मोहीम अभिमानाने पूर्ण केली.
