Jasprit Bumrah vs Pak Batter in Asia Cup 2025 : आशिया कप 2025 मध्ये भारत आणि पाकिस्तान यांच्यातील बहुप्रतिक्षित सामना 14 सप्टेंबरला दुबईत रंगणार आहे. या सामन्यात उत्साह आणि रोमांच शिगेला पोहोचेल, पण त्यात आणखी रंगत आणणार आहे. कारण भारतीय वेगवान गोलंदाज जसप्रीत बुमराहने पाकिस्तानच्या फलंदाजांसमोर उभे केलेले आव्हान. पाकिस्तानच्या फलंदाजांना टी-20 आंतरराष्ट्रीय सामन्यांमध्ये बुमराहविरुद्ध आतापर्यंत जे जमले नाही, ते करून दाखवण्याचे खुले आव्हान आहे आणि ते म्हणजे बुमराहच्या गोलंदाजीवर एकही षटकार न ठोकता येणे!

बुमराहविरुद्ध षटकारासाठी पाकिस्तानची धडपड –

टी-२० आंतरराष्ट्रीय सामन्यांमध्ये जसप्रीत बुमराहने पाकिस्तानविरुद्ध आतापर्यंत 391 चेंडू टाकले आहेत, पण त्यापैकी एकाही चेंडूवर पाकिस्तानी फलंदाजांना षटकार ठोकता आलेला नाही. याचा अर्थ असा की, जेव्हा-जेव्हा बुमराह गोलंदाजीला आला, तेव्हा पाकिस्तानचे फलंदाज षटकार मारण्यात असमर्थ राहिले. बुमराहने आपल्या अचूक आणि भेदक गोलंदाजीने पाकिस्तानी फलंदाजांना पूर्णपणे हतबल केले आहे.

भारत-पाक केवळ लढत नव्हे, तर आव्हान

यंदाचा आशिया कप टी-२० स्वरूपात खेळला जात आहे. 14 सप्टेंबरला दुबईत होणारा भारत-पाक सामना हा केवळ एक सामना नसेल, तर पाकिस्तानी फलंदाजांसाठी बुमराहविरुद्ध षटकार ठोकण्याचे मोठे आव्हान असेल. आता सर्वांचे लक्ष याकडे लागले आहे की, बुमराह आपल्या 391 चेंडूंमध्ये आणखी काही चेंडूंची भर घालून आपला विक्रम कायम ठेवतो, की पाकिस्तानचा एखादा फलंदाज बुमराहच्या या आव्हानाला पार करतो.

हेही वाचा – US Open 2025 : यूएस ओपन जिंकताच कार्लोस अल्काराझवर कोट्यवधींचा पाऊस, उपविजेता सिनरही झाला मालामाल

बुमराह असतो तिथे भारताची विजयी घोडदौड –

जसप्रीत बुमराहच्या उपस्थितीत भारतीय संघ आशिया कपमध्ये अपराजित राहिला आहे. बुमराहने आतापर्यंत खेळलेल्या 12 सामन्यांमध्ये भारताने एकही सामना गमावलेला नाही. विशेष म्हणजे, या 12 सामन्यांपैकी एकाही सामन्यात बुमराह विकेटशिवाय परतला नाही. प्रत्येक सामन्यात त्याने किमान एक तरी विकेट घेतली आहे. त्यामुळे बुमराहचा समावेश असलेला भारतीय संघ आशिया कप 2025 मध्ये विजयाचा प्रबळ दावेदार मानला जात आहे.

हेही वाचा – हरभजन सिंग धावला पंजाबमधील पूरग्रस्तांच्या मदतीला; बोटी आणि रुग्णवाहिकाही पुरवल्या….

पाकिस्तान बुमराहच्या जाळ्यातून सुटका करणार का?

14 सप्टेंबरला होणारा हा सामना केवळ दोन संघांमधील लढत नसून, बुमराहच्या गोलंदाजीविरुद्ध पाकिस्तानी फलंदाजांचा कस पणाला लागणार आहे. पाकिस्तानच्या फलंदाजांना बुमराहच्या गोलंदाजीवर षटकार ठोकण्याचे स्वप्न पूर्ण करता येईल का, की बुमराह आपली ही अचूक गोलंदाजी कायम ठेवेल? याचे उत्तर 14 सप्टेंबरला दुबईच्या मैदानावर मिळेल.