Ashish Shelar : मुख्य निवडणूक आयुक्त ज्ञानेश कुमार यांच्या विरोधात ठाकरेसेना आणि मनसे यांनी काढलेली निषेध रॅली म्हणजे जागतिक प्राणी दिनाच्या निमित्ताने काढलेला कोल्ह्यांचा मोर्चा होता, अशी टीका मंत्री आशिष शेलार (Ashish Shelar) यांनी केली.

निवडणुका जिंकता न आल्यामुळेच ठाकरेसेना प्रमुख उद्धव ठाकरे, मनसे अध्यक्ष राज ठाकरे आणि इतर विरोधी पक्ष निवडणूक आयोग व इलेक्ट्रॉनिक मतदान यंत्रांवर प्रश्नचिन्ह उपस्थित करत आहेत, असा आरोप त्यांनी (Ashish Shelar) केला.

शेलार म्हणाले, आज जागतिक प्राणी दिन आहे. ही रॅली आणि तिचे स्वरूप पाहता, मला वाटते की हा काही गर्जना मोर्चा नाही, तर कोल्ह्यांचा मोर्चा आहे. द्राक्षे आंबट आहेत असे म्हणणाऱ्या कोल्ह्यांसारखी ही स्थिती आहे. निवडणुका जिंकता न आल्याचे खापर ते निवडणूक आयोगावर फोडत आहेत. हा लबाड लोकांचा मेळावा आहे. अशी भूमिका घेण्यापूर्वी त्यांनी स्वतःच्या राजकीय संबंधांकडे एकदा पाहिले पाहिजे.

मतभेदानंतर एकमत कसे होते हे तुम्हाला पाहायचे असेल, तर निवडणूक आयोगाकडे कशाला पाहता? उद्धवजी आणि राज ठाकरे, तुम्ही स्वतः आरशात पहा, असे , असे शेलार यांनी म्हटले. बॅलेट पेपरद्वारे मतदानाची मागणी करण्याबाबत बोलताना शेलार म्हणाले की, ईव्हीएम काही भाजप सरकारने आणलेली नाहीत.

त्यांनी १९७० च्या दशकाच्या उत्तरार्धात ईव्हीएमचा विकास, १९८२ मध्ये केरळमध्ये त्यांचा झालेला पहिला वापर आणि तत्कालीन पंतप्रधान राजीव गांधी यांच्या कार्यकाळात १९८९ मध्ये लोकप्रतिनिधी कायद्यात करण्यात आलेली सुधारणा यांचा संदर्भ दिला.

त्यांनी नमूद केले की, उद्धव ठाकरे यांच्या पक्षाने २००७ आणि २०१२ मध्ये मुंबई महानगरपालिकेच्या निवडणुका जिंकल्या होत्या आणि २०१७ मध्येही ईव्हीएमचा वापर करून आपली सत्ता कायम राखली होती.

२००९ च्या महाराष्ट्र विधानसभा निवडणुकीत राज ठाकरे यांच्या पक्षाने १३ जागा जिंकल्या होत्या, तर त्याच काळात उद्धव ठाकरे यांच्या पक्षाने ईव्हीएमचा वापर करून मुंबई महानगरपालिकेची निवडणूक जिंकली होती. जर तुम्ही जिंकलात तर ईव्हीएम चांगली असतात; पण जर दुसरे कोणी जिंकले, तर ती चुकीची ठरतात. हीच त्यांची भूमिका आहे, असे शेलार (Ashish Shelar) म्हणाले.