Gyanesh Kumar – केरळमचे गृहमंत्री रमेश चेन्नीथला यांनी २००६ मधील केरळम राज्य परिवहन प्रकल्प रस्ते प्रकल्पाशी संबंधित भ्रष्टाचाराचे आरोप आणि त्या कामाशी संबंधित एका मलेशियन सिव्हिल इंजिनिअरचा मृत्यू या प्रकरणांची प्राथमिक चौकशी करण्याचे आदेश दिले आहेत. तत्कालीन मुख्य निवडणूक आयुक्त ज्ञानेश कुमार हे त्यावेळी राज्याचे सार्वजनिक बांधकाम विभाग सचिव म्हणून कार्यरत होते, असे वृत्तपीटीआय वृत्तसंस्थेने रविवारी दिले.

२००६ मध्ये कुमार यांच्याविरुद्ध करण्यात आलेल्या प्राथमिक दक्षता चौकशीशी संबंधित फाइल्स केरळच्या गृह विभागाने मागवल्यानंतर काही दिवसांतच ही घडामोड समोर आली आहे.केरळम प्रदेश काॅंग्रेस नेते मलयिनकीझू वेणुगोपाल यांनी शनिवारी कुमार यांच्याविरुद्ध चौकशीची मागणी करणारी तक्रार दाखल केल्यानंतर चेन्नीथला यांनी ही नवीन चौकशी करण्याचे आदेश दिले, वृत्तसंस्थेने म्हटले आहे. कुमार यांच्याविरुद्ध पुढील कोणतीही कारवाई करण्यापूर्वी व्हिजिलन्स अँड अँटी-करप्शन ब्युरोने प्राथमिक चौकशी करावी, असे निर्देश देण्यात आले आहेत.

पत्रकारांशी बोलताना चेन्नीथला म्हणाले की, आम्ही तक्रारीची पडताळणी केली असून आरोपांमध्ये प्रथमदर्शनी तथ्य असल्याचे आम्हाला आढळले आहे. याप्रकराणी सविस्तर दक्षता चौकशी होणे आवश्यक आहे. तसेच, सविस्तर चौकशीसाठी कायदेशीर पावले उचलण्याचे निर्देश दक्षता विभागाचे संचालक मनोज अब्राहम यांना देण्यापूर्वी मी मुख्यमंत्री व्ही. डी. सतीशन यांच्याशी चर्चा केली आहे.

ली यांच्या मृत्यूनंतर २००६ मध्ये दक्षता विभागाची चौकशी सुरू झाली होती. या चौकशीत प्रकरणाची आणि क्वालालंपूरमध्ये लिहिलेल्या चिठ्ठीतील मजकुराची तपासणी करण्यात आली होती, परंतु त्यानंतर ती प्रक्रिया पुढे सरकली नाही. २००६ मध्ये सरकार बदलल्यानंतर हे प्रकरण दडपून टाकण्यात आले. मात्र, पीटीआयच्या वृत्तानुसार, मंत्र्यांनी स्पष्ट केले की त्यांनी स्वतः ती आत्महत्येची चिठ्ठी पाहिलेली नाही आणि त्यातील मजकुराबाबतची माहिती प्रसारमाध्यमांतून मिळाली आहे. ही चौकशी पूर्वी अर्धवट सोडण्यात आलेल्या तपासाचाच एक भाग आहे.

काय आहे प्रकरण?

हे प्रकरण मलेशियन सिव्हिल इंजिनिअर ली सी बीन यांच्या आत्महत्येशी संबंधित आहे. ते केरळम राज्य परिवहन प्रकल्पांतर्गत एमसी रोडच्या सुधारणेचे काम करणाऱ्या पाटी-बेल या संयुक्त उपक्रमाशी जोडलेले होते. २००६ मध्ये, अंगमाली ते तिरुवनंतपुरम या एमसी रोडच्या पुनर्बांधणीसाठी २१५ कोटी रुपयांचा जागतिक बँकेच्या अर्थसाहाय्याने चालणारा प्रकल्प हाती घेण्यात आला होता.

पटी-बेल ही मलेशियन कंपनी आणि भागीरथा इंजिनिअरिंग यांच्या संयुक्त उपक्रमाने हे काम हाती घेतले होते. मलेशियाला परतण्यापूर्वी आणि तिथे आत्महत्या करण्यापूर्वी, बांधकामादरम्यान ली यांनी अनेक तक्रारी केल्या होत्या. कथितरीत्या आत्महत्येच्या दोन चिठ्ठ्या सापडल्या होत्या; त्यापैकी एक ली यांच्या पत्नीला आणि दुसरी कंपनीच्या संचालकाला उद्देशून लिहिलेली होती आणि त्यामध्ये कुमार यांचा स्पष्ट उल्लेख होता.