Ashish Shelar : राज्यातील सर्व लोककला प्रकार आणि लोककलावंतांची राज्यव्यापी जनगणना (सर्वेक्षण) करून त्यांना शासनमान्य अधिकृत ओळखपत्र देण्यात यावे, तसेच लोककला प्रकारांची प्रमाणित माहिती शासनाच्या संकेतस्थळावर उपलब्ध करून देण्‍याबाबत प्रयत्‍नशिल असल्‍याचे सांस्कृतिक कार्यमंत्री आशिष शेलार (Ashish Shelar) यांनी सांगितले.

लोककलवंतांच्या विविध प्रश्नावर लोककला अकादमीचे विभागप्रमुख प्रा. डॉ. गणेश चंदनशिवे, ज्येष्ठ पत्रकार व लोककलेचे अभ्यासक खंडूराज गायकवाड आणि लोककलेचे अभ्यासक डॉ. शिवाजी वाघमारे यांनी आशिष शेलार (Ashish Shelar) यांची भेट घेतली.

महाराष्ट्र राज्य स्थापनेनंतर ६६ वर्षे उलटून गेली असली तरी राज्यातील लोककला प्रकार आणि लोककलावंतांची अधिकृत शासकीय नोंद उपलब्ध नसल्याने सांस्कृतिक धोरणाची प्रभावी अंमलबजावणी, आर्थिक नियोजन आणि लोककलावंतांसाठीच्या विविध कल्याणकारी योजनांचे अचूक नियोजन करण्यात अडचणी येत असल्याचा मुद्दा शिष्टमंडळाने मांडला.

दि. १६ एप्रिल २०१५ च्या शासन निर्णयानुसार लोककला, लोकनृत्य आणि लोकवाद्यांचे जतन, संकलन, दस्तऐवजीकरण व संगणकीकरणाची मोहीम हाती घेण्यात आली होती. मात्र, अपेक्षित उद्दिष्टे पूर्ण न झाल्याने हा उपक्रम नव्याने आणि अधिक व्यापक स्वरूपात राबविण्याची आवश्यकता असल्याचे निवेदनात नमूद करण्यात आले.

यापूर्वी जिल्हानिहाय सांस्कृतिक कार्य विभागाच्या वतीने लोककला महोत्सव आयोजित केले जात होते. मात्र, हे महोत्सव बंद झाल्याने स्थानिक लोककलावंतांना आपली कला सादर करण्याची संधी मिळत नाही. त्यामुळे हे महोत्सव तातडीने पुन्हा सुरू करावेत, अशी मागणी प्रा. डॉ. गणेश चंदनशिवे यांनी केली. याबाबतही सकारात्मक निर्णय घेतला जाईल, असे आशिष शेलार (Ashish Shelar) यांनी स्पष्ट केले.