Ashadhi Wari ST Bus – आषाढी एकादशीला पंढरपूरला विठूरायाच्या दर्शनासाठी जाणाऱ्या भाविकांचा प्रवास अधिक सुलभ आणि सुरक्षित व्हावा, यासाठी राज्य मार्ग परिवहन महामंडळाने (एसटी) थेट एसटी तुमच्या दारात ही योजना राबवली आहे. त्यामध्ये पंढरपूर यात्रेदरम्यान गावातील किंवा एकाच परिसरातील ४० प्रवाशांचा ग्रुप एकत्र आल्यास, एसटी महामंडळ थेट त्यांच्या गावापर्यंत किंवा घराच्या दारापर्यंत विशेष बस पाठवणार असल्याची माहिती पुणे विभागीय वाहतूक अधिकारी कमलेश धनराळे यांनी दिली.

आषाढी वारीत रेल्वे आणि मुख्य बस स्थानकांवर प्रवाशांची मोठी गर्दी असते. अशा गर्दीवेळी वृद्ध, महिला आणि लहान मुलांना बस पकडण्यासाठी मोठी कसरत करावी लागते. हीच गैरसोय टाळण्यासाठी आणि प्रवाशांचा त्रास कमी करण्यासाठी महामंडळाने ही नवीन, सुलभ योजना सुरू केली आहे. कोणत्याही एका भागातील, गावातील, मंडळातील किंवा गृहनिर्माण संस्थेतील ४० भाविक एकत्र आले, तर एसटी प्रशासनाकडून बस थेट त्यांच्या सोयीच्या ठिकाणी दिली जाईल.

त्यामुळे भाविकांना एसटी स्थानकावर येऊन बस पकडण्याची आवशक्यता राहणार नाही. या ग्रुप बुकिंगमध्ये वैयक्तिक प्रवासाप्रमाणेच सामूहिक प्रवासातही शासनाच्या सर्व सवलत योजना पूर्णपणे लागू राहतील. त्यामध्ये महिला प्रवाशांसाठी असणारी तिकिटांमधील ५० टक्के सवलत (महिला सन्मान योजना) आणि ज्येष्ठ नागरिकांसाठीच्या विशेष सवलतींचा (अमृत ज्येष्ठ नागरिक योजना) फायदा सर्व प्रवाशांना घेता येईल. यामुळे हक्काच्या आणि सुरक्षित प्रवासासोबतच भाविकांची मोठी आर्थिक बचतही होणार आहे.

“विठ्ठल दर्शनासाठी जाणाऱ्या भाविकांची सेवा करणे हे आमचे कर्तव्य आहे. प्रवाशी भाविकांनी केवळ ४० जणांचा ग्रुप तयार करावा आणि एसटीचे बुकिंग करावे. एसटी त्यांच्या दारात येऊन विठुरायाच्या दर्शनाला घेऊन जाईल आणि परत आणून सोडेल. या सुविधेचा लाभ घेण्यासाठी भाविकांनी त्वरित आपल्या जवळच्या एसटी आगाराशी संपर्क साधावा.”
– कमलेश धनराळे, विभागीय वाहतूक अधिकारी, पुणे एसटी विभाग