Apple Price Hike – इराणमध्ये सरकारविरोधी आंदोलन तीव्र झाल्याने त्याचा परिणाम तेथून आयात होणाऱ्या सफरचंदावर झाला आहे. मागणीच्या तुलनेत आवक कमी झाल्याने इराणी सफरचंदाच्या दरात दहा किलोमागे १५० ते २०० रुपयांनी वाढ झाली आहे. इराणमधून बोटीतून मुंबईत सफरचंदे पाठविली जातात. तेथून पुण्यासह देशभरातील बाजारपेठेत सफरचंदे विक्रीस पाठविली जातात. पुणे कृषी उत्पन्न बाजार समितीच्या गुलटेकडी मार्केट यार्डातील फळबाजारात गेल्या आठवड्यात आठ ते दहा हजार क्रेट्सची (प्लास्टिक जाळी) सफरचंदाची आवक झाली होती. सध्या बाजारात चार ते साडेचार हजार क्रेट्स सफरचंदाची आवक होत असून, मागणीच्या तुलनेत सफरचंदाची आवक कमी होत आहे. मागणी वाढल्याने इराणधील सफरचंदाच्या दरात वाढ झाली आहे, अशी माहिती श्री छत्रपती शिवाजी मार्केट यार्डातील सफरचंद व्यापारी श्री गुुरुदेव दत्त एजन्सीचे संचालक सत्यजीत सुयोग झेंडे यांनी दिली. इराणी सफरचंदासह अफगाणिस्तानातील सफचंदाच्या मागणीत वाढ झाली. त्यामुळे अफगाणिस्तानातील सफरचंदाच्या दरात वाढ झाली आहे. दहा किलो इराणी सफरचंदाचे दर १३५० ते १५०० रुपये, अफगाणिस्तानी दहा किलो सफरचंदाला ९०० ते एक हजार रुपये दर मिळाले आहेत. न्यूझीलंडमधील सफरचंदावरील आयातशुल्क ५० टक्क्यांहून २५ टक्के करण्यात आले आहे. पुढील महिन्यात न्यूझीलंडमधील सफरचंदे बाजारात दाखल होतील, असे त्यांनी नमूद केले. काश्मिरमधील सफरचंदे नियंत्रित वातावरणात ठेवली जातात. एक फेब्रुवारीनंतर नियंत्रण वातावरणात (कंट्रोल्ड ॲटमाॅस्फिअर) साठवणूक केलेली काश्मिरी सफरचंदे बाजारात विक्रीस पाठविली जातील. न्यूझीलंडमधील सफरचंदाची आवक पुढील महिन्यात होणार आहे. फेब्रुवारी महिन्याच्या दुसऱ्या आठवड्यात मुस्लीम धर्मियांच्या रमजान महिन्यास प्रारंभ होणार आहे. सध्या बाजारात अफगाणिस्तान, इराणमधील सफरचंदे उपलब्ध आहेत. सफरचंदांना मागणी वाढल्याने दर तेजीत आहेत. रमजान महिन्यात सर्व प्रकारच्या फळांना मागणी वाढणार आहे. काश्मीर, न्यूझीलंडमधील सफरचंदे बाजारात विक्रीस दाखल झाल्यानंतर दरात घट होईल, असे सफरचंद व्यापारी सत्यजित सुयोग झेंडे यांनी सांगितले.
