Pune Gas Shortage – ‘नाष्टा नाही मिळणार, चहा घ्या’ ‘चहा पण तयार असलेला, स्पेशल करून मिळणार नाही’ ही परिस्थिती येथील मार्केट यार्डातील. शेतीमाल विक्रीसाठी आलेल्या शेतकऱ्यांसह बाजार घटकांवर उपासमारीची वेळ आहे. त्यामुळे चहासोबत बिस्कीटे खाऊन भूक शमविण्याची शक्कल काहींकडून लढविली जात आहे. अमेरिका, इस्रायल आणि इराण युद्धामुळे गॅस सिलिंडरचा तुटवडा निर्माण झाला आहे. याचा फटका मार्केट यार्डात बसत आहे.

शारदा गजानन मंदिरातर्फे शेतकऱ्यांना मोफत जेवण दिले जाते. तर इतरांकडून नाममात्र शुल्क आकारले जाते. मात्र, गॅस तुटवट्यामुळे हे जेवण बंद आहे. मार्केट यार्डात अनेक हॉटेल्स आहेत. येथे गर्दी असल्यामुळे बाहेरून पोहे, समोसा घेऊन लोक येतात. हे लोक तर आता थांबले आहेत. तर फळ, भाजीपाला आणि फुल विभागात कित्येक हॉटेल गॅसअभावी बंद ठेवण्यात येत आहेत. नाष्टा तयार करण्यास अधिक वेळ लागतो.

त्यामुळे नाष्टाऐवजी चहा बनविण्यास काही हॉटेल चालकांकडून प्राधान्य देण्यात येत आहे. बाजारात आलेल्यांना चहा सहज मिळतो. मात्र, नाष्टा मिळणे तर अवघड झाले आहे. जेवण तर लांबची गोष्ट झाली आहे. युद्धामुळे परदेशात होणारी निर्यात ठप्प झाल्याने, बाजारात आवक वाढली आहे. यामुळे कमी मिळणारा भाव, याबरोबरच आता नाष्टा मिळवण्यासाठी कसरत करावी लागत आहे.

काहींनी रात्री चूल पेटवली. मात्र, बाजार असल्यामुळे त्याला मर्यादा आहे. सकाळी गाड्यांची आवक सुरू झाल्यानंतर ती बंद करावी लागली. त्यावर बनविलेले पोहे, उपीट, शिऱ्याची विक्री केली. तर काहींनी इलेक्ट्रीक शेगडी घेतली आहे. मात्र, तिला जोर नसल्याने नाष्टा बनविणे अवघड जाते. त्याऐवजी चहा बनविण्यातच हॉटेलवाले प्राधान्य देत असल्याचे दिसून येत आहे.

“खाद्यपदार्थ मिळत नसल्याने शेतकरी, कामगार आणि बाजार घटकांच्या पोटाचे हाल होत आहेत. उपासमारीची वेळ त्यांच्यावर येत आहे. या पार्श्वभूमीवर बाजार समिती प्रशासनाने पुढाकार घेऊन गॅस उपलब्ध करून द्यावा.”
– राजेंद्र चोरघे, हॉटेल चालक, मार्केट यार्ड