Amruta Fadnavis: महाराष्ट्राचे मुख्यमंत्री देवेंद्र फडणवीस यांच्या पत्नी आणि सामाजिक कार्यकर्त्या अमृता फडणवीस (Amruta Fadnavis ) या नेहमीच विविध सामाजिक उपक्रमांमुळे चर्चेत असतात. यावेळी त्यांनी महिला सक्षमीकरण आणि पर्यावरण संवर्धनाचा संदेश देत मुंबईत आयोजित करण्यात आलेल्या एका विशेष कार्यक्रमात ‘पिंक ई-रिक्षा’ चालवून सर्वांचे लक्ष वेधून घेतले आहे. त्यांचा हा व्हिडीओ सध्या सोशल मीडियावर मोठ्या प्रमाणात व्हायरल होत आहे.

जागतिक पर्यावरण दिनाच्या पार्श्वभूमीवर मुंबईमध्ये भामला फाउंडेशन आणि गोदरेज यांच्या संयुक्त विद्यमाने ‘पिंक ई-रिक्षा’ उपक्रमाचा शुभारंभ करण्यात आला. या उपक्रमाचा मुख्य उद्देश महिलांना रोजगाराच्या नवीन संधी उपलब्ध करून देणे आणि पर्यावरणपूरक वाहतुकीला प्रोत्साहन देणे हा आहे.  (Amruta Fadnavis)

या कार्यक्रमाला अमृता फडणवीस यांच्यासोबत बॉलिवूड अभिनेत्री भूमी पेडणेकर आणि नुपूर सॅनॉन यांनीही उपस्थिती लावली होती. कार्यक्रमादरम्यान महिलांचा उत्साह वाढवण्यासाठी आणि त्यांना प्रेरणा देण्यासाठी अमृता फडणवीस यांनी स्वतः ई-रिक्षाचे स्टेअरिंग हाती घेतले. त्यांनी काही अंतर रिक्षा चालवून महिला स्वावलंबनाचा संदेश दिला.

या उपक्रमाअंतर्गत सुमारे एक हजार महिलांना ‘पिंक ई-रिक्षा’ उपलब्ध करून देण्यात येणार आहेत. या माध्यमातून अनेक महिलांना रोजगार मिळण्यास मदत होणार असून त्यांना आर्थिकदृष्ट्या सक्षम होण्याची संधी मिळणार आहे. महिलांना स्वतःच्या पायावर उभे राहण्यासाठी आणि आत्मनिर्भर बनण्यासाठी हा उपक्रम महत्त्वाचा ठरणार असल्याचे आयोजकांनी सांगितले.  (Amruta Fadnavis)

#WATCH | Mumbai: Amruta Fadnavis, wife of Maharashtra CM Devendra Fadnavis, drives an autorickshaw as she attends the launch of Pink E-Rickshaw support initiative on World Environment Day under Bhamla Foundation’s Women-Led Green Mobility Program. pic.twitter.com/FOOKreLMAM

— ANI (@ANI) June 1, 2026

अमृता फडणवीस यांनी रिक्षा चालवतानाचे दृश्य उपस्थितांनी आपल्या मोबाईलमध्ये टिपले. त्यानंतर हा व्हिडीओ सोशल मीडियावर मोठ्या प्रमाणात शेअर करण्यात आला. अनेकांनी त्यांच्या या कृतीचे कौतुक केले असून महिला सक्षमीकरणासाठी दिलेल्या संदेशाचे स्वागत केले आहे.

यापूर्वीही अमृता फडणवीस यांनी पर्यावरण आणि सामाजिक जाणीव निर्माण करणाऱ्या अनेक उपक्रमांमध्ये सक्रिय सहभाग घेतला आहे. काही दिवसांपूर्वीच त्यांनी इंधन बचतीचा संदेश देण्यासाठी कारऐवजी सायकल चालवली होती. केंद्र सरकारच्या इंधन बचतीच्या आवाहनाला प्रतिसाद देत त्यांनी नागरिकांनाही पर्यावरणपूरक पर्यायांचा वापर करण्याचे आवाहन केले होते.  (Amruta Fadnavis)

 

आता ‘पिंक ई-रिक्षा’ उपक्रमात सहभाग घेत त्यांनी पुन्हा एकदा समाजापुढे सकारात्मक संदेश ठेवला आहे. महिलांना रोजगार, स्वावलंबन आणि आत्मविश्वास मिळवून देण्यासाठी अशा उपक्रमांची गरज असल्याचे मत अनेकांनी व्यक्त केले आहे.

सध्या अमृता फडणवीस यांचा ई-रिक्षा चालवतानाचा व्हिडीओ सोशल मीडियावर चर्चेचा विषय ठरला असून, महिला सक्षमीकरण आणि पर्यावरण संरक्षण या दोन्ही महत्त्वाच्या विषयांकडे लोकांचे लक्ष वेधण्यात या उपक्रमाला यश मिळताना दिसत आहे.