Alephata News – अंतरवाली सराटी येथे संघर्षयोद्धा मनोज जरांगे-पाटील यांच्या सुरू असलेल्या आमरण उपोषणाला पाठिंबा देण्यासाठी तसेच मराठा समाजाच्या विविध मागण्यांकडे शासनाचे लक्ष वेधण्यासाठी सकल मराठा समाज, जुन्नरच्या वतीने गुरुवारी आळेफाटा येथे रास्ता रोको आंदोलन करण्यात आले. सकाळी दहाच्या सुमारास सुरू झालेल्या या आंदोलनात आंदोलकांनी घोषणाबाजी करत शासनाने मराठा समाजाच्या मागण्यांवर तातडीने सकारात्मक निर्णय घ्यावा,

अशी मागणी केली. छत्रपती शिवाजी महाराजांच्या पुतळ्यास पुष्पहार अर्पण करून आंदोलनाला सुरुवात करण्यात आली. यावेळी मराठा समाजाच्या प्रश्नांवर शासनाने केवळ आश्वासनांपुरते न थांबता ठोस निर्णय घ्यावा, अशी भूमिका आंदोलकांनी मांडली. मागण्यांची पूर्तता करण्यासाठी शासनाने तातडीने पावले उचलली नाहीत, तर आंदोलनाची दिशा अधिक तीव्र करण्यात येईल, असा इशाराही देण्यात आला.

मराठा समाजाच्या मागण्यांबाबत सरकारने गांभीर्याने निर्णय घेण्याची आवश्यकता आहे. केवळ आश्वासनांवर आता समाधान मानले जाणार नाही. मागण्यांची तातडीने पूर्तता न झाल्यास मोठ्या संख्येने मुंबईकडे कूच करण्यात येईल, अशी भूमिका आंदोलनकर्त्यांनी व्यक्त केली. या आंदोलनाला जिल्हा परिषद सदस्य मंगेश काकडे, बाजार समिती सदस्य माऊली खंडागळे, पंचायत समिती सदस्य जयसिंग पोटे,

बाजार समितीचे माजी सभापती रघुनाथ लेंडे, मराठा सेवक पिंटू वाळुंज, मराठा सेवा संघाचे अध्यक्ष गणेश महाबरे, शेतकरी संघटनेचे नेते सचिन थोरवे, शिवबा संघटनेचे अध्यक्ष हरेश कोकणे, तेजस कुर्‍हाडे, राहुल ढेंबरे, सह्याद्री भिसे, गरुड वकील, स्वाभिमानी शेतकरी संघटनेचे प्रमोद खांडगे, अनिल गावडे, योगेश तोडकर यांच्यासह मोठ्या संख्येने समाजबांधव सहभागी झाले होते.

आंदोलनाची माहिती मिळताच महसूल प्रशासनाच्या वतीने मंडल अधिकारी राजेश ठुबे आंदोलनस्थळी उपस्थित राहिले. तहसीलदार रणजीत भोसले यांच्या सूचनेनुसार त्यांनी आंदोलकांचे निवेदन स्वीकारले. मराठा समाजाच्या मागण्या शासनाच्या निदर्शनास आणून देण्यात येतील, असे प्रशासनाकडून सांगण्यात आले.

आळेफाट्यात पोलीस बंदोबस्त
रास्ता रोकोच्या पार्श्वभूमीवर आळेफाटा पोलीस ठाण्याचे पोलीस निरीक्षक विश्वास जाधव यांच्या मार्गदर्शनाखाली आंदोलनस्थळी पोलीस बंदोबस्त तैनात करण्यात आला होता. आंदोलनादरम्यान कायदा व सुव्यवस्था अबाधित राहावी, यासाठी पोलीस प्रशासनाकडून खबरदारी घेण्यात आली.