Alandi Mauli Temple – संत ज्ञानेश्वर महाराज मंदिरात 22 मे 2026 रोजी घडलेल्या चोरीच्या प्रकरणाची गंभीर दखल घेत आळंदी संस्थान प्रशासनाने संबंधित कर्मचार्‍यांविरोधात शिस्तभंगाची कारवाई केली आहे. विश्वस्त मंडळाच्या निर्णयानुसार दोन कर्मचार्‍यांची सेवा समाप्त करण्यात आली असून दोघांना निलंबित करण्यात आले आहे. मंदिरातील चोरीनंतर संस्थान प्रशासनाने संबंधित कर्मचार्‍यांकडून खुलासे मागविले होते.

त्यानंतर 29 मे रोजी झालेल्या विश्वस्त मंडळाच्या बैठकीत सर्व खुलासे, अहवाल आणि उपलब्ध माहितीचे परीक्षण करण्यात आले. या परीक्षणानंतर कामातील निष्काळजीपणा आणि जबाबदारीतील त्रुटी आढळून आल्याने संबंधितांवर कारवाईचा निर्णय घेण्यात आला. विश्वस्त मंडळाने दिलेल्या माहितीनुसार, एका हंगामी सेवकाची सेवा समाप्त करण्यात आली आहे.

तसेच एका सहाय्यक व्यवस्थापकाचीही सेवा समाप्त करण्यात आली आहे. दरम्यान, या प्रकरणातील रोखपाल आणि आचारी यांना निलंबित करण्यात आले असून पोलीस तपास पूर्ण होईपर्यंत त्यांना दररोज संस्थान कार्यालयात उपस्थित राहून हजेरी लावण्याचे निर्देश देण्यात आले आहेत. तपास प्रक्रियेस पूर्ण सहकार्य करण्यासही त्यांना सांगण्यात आले आहे.

याशिवाय, व्यवस्थापनातील हलगर्जीपणाबाबत प्रमुख व्यवस्थापकांना समजपत्र देऊन सक्त ताकीद देण्यात आली आहे. संस्थानच्या कामकाजात कोणत्याही प्रकारचा निष्काळजीपणा खपवून घेतला जाणार नसल्याचा स्पष्ट संदेश या कारवाईतून देण्यात आला आहे. या कारवाईबाबतची माहिती विश्वस्त मंडळाच्या वतीने प्रसिद्ध करण्यात आली असून मंदिर प्रशासनातील शिस्त, पारदर्शकता आणि जबाबदारी कायम राखण्यासाठी आवश्यक ती पावले उचलण्यात आल्याचे स्पष्ट करण्यात आले आहे.