Adulterated Alcohol – खेड तालुक्याच्या दुर्गम डोंगररांगा, नदीनाले आणि ग्रामीण भागात हातभट्टी दारूच्या अड्ड्यांचे जाळे दिवसेंदिवस वाढत असल्याचे चित्र समोर येत आहे. पोलिसांकडून अधूनमधून कारवाया होत असल्या तरी या अवैध व्यवसायावर प्रभावी अंकुश बसत नसल्याने नागरिकांमध्ये चिंता व्यक्त केली जात आहे. हातभट्टी दारूच्या निर्मितीसाठी वापरण्यात येणार्‍या निकृष्ट आणि घातक रसायनांमुळे केवळ शासनाचा महसूल बुडत नाही,

तर सार्वजनिक आरोग्यालाही गंभीर धोका निर्माण होत आहे. ग्रामीण भागातील अनेक ठिकाणी चोरट्या पद्धतीने दारू निर्मिती सुरू असल्याची माहिती समोर येत आहे. तालुक्यातील इंद्रायणी, भीमा आणि भामा नदी परिसरातील निर्जन जागा, ओढ्यांचे किनारे तसेच काही दुर्गम भागांमध्ये हातभट्टी दारूची निर्मिती होत असल्याचे सांगितले जात आहे.

दारू तयार करण्यासाठी युरिया, नवसागर यांसारख्या घातक रसायनांचा वापर केला जात असल्याने या दारूचे सेवन आरोग्यासाठी अत्यंत धोकादायक ठरत आहे. तयार झालेली दारू रात्रीच्या वेळी विविध वाहनांमधून शहरांकडे पाठवली जात असल्याची माहिती स्थानिकांकडून दिली जात आहे.

या विषारी दारूमुळे विषबाधा, दृष्टीदोष तसेच मृत्यूच्या घटनाही घडल्याच्या तक्रारी वेळोवेळी समोर येत आहेत. हातभट्टी दारूच्या अवैध व्यवसायामुळे ग्रामीण भागातील सामाजिक वातावरण बिघडत असल्याची भावना नागरिकांनी व्यक्त केली आहे. या व्यवसायामागील मुख्य सूत्रधारांपर्यंत पोहोचून कठोर कारवाई करण्याची मागणी होत आहे.

तसेच संबंधित भागात नियमित छापे, गस्त आणि जनजागृती मोहिमा राबवण्याची गरजही व्यक्त केली जात आहे. हातभट्टी दारू तयार करण्यासाठी वापरले जाणारे निकृष्ट आणि विषारी रसायन मानवी आरोग्यास गंभीर धोका निर्माण करतात. अशा अवैध व्यवसायांविरोधात सातत्यपूर्ण कारवाई होणे आवश्यक आहे, असे नागरिकांचे मत आहे.

पोलिसांची धडक कारवाई
वाढत्या तक्रारी आणि नागरिकांच्या दबावानंतर चाकण व महाळुंगे पोलिसांनी हातभट्टी अड्ड्यांविरोधात विशेष मोहीम हाती घेतली. या कारवाईत पोलिसांनी गावठी दारू निर्मितीसाठी वापरले जाणारे साहित्य आणि तयार दारू जप्त केली. कारवाईदरम्यान 30 हजार रुपये किमतीचे सुमारे 350 लिटर रसायन, 5 हजार 500 रुपये किमतीची 70 लिटर तयार गावठी दारू तसेच 44 हजार 100 रुपये किमतीचे हातभट्टी निर्मितीसाठी लागणारे साहित्य जप्त करण्यात आले. एकूण 79 हजार 600 रुपयांचा मुद्देमाल पोलिसांनी ताब्यात घेतला.