Ajit Pawar Pune : राज्याचे उपमुख्यमंत्री आणि पुणे जिल्ह्याचे पालकमंत्री अजित पवार यांनी वाढत्या कोरोना रुग्णसंख्येसंदर्भात पुण्यात आढावा बैठक घेतली. सर्वात जास्त रुग्ण केरळमध्ये बघायला मिळत आहेत. महाराष्ट्रातही आहेत, पुणे आणि पिंपरी चिंचवडबद्दल बोलायचे झाल्यास सगळं कंट्रोलमध्ये असल्याचे अजित पवार यांनी सांगितले. तसेच नागरिकांनी काय काळजी घेतली पाहिजे याबाबतही अजित पवार यांनी माहिती दिली.

बैठकीनंतर त्यांनी माध्यमांशी संवाद साधला, त्यावेळी ते बोलत होते. जिल्हा परिषदांनी काय केलं पाहिजे, सिव्हील सर्जनने काय केले पाहिजे, डीएचओ असतील आपल्या दोन्ही महानगर पालिका असतील, महापालिकेचे आरोग्य विभाग असतील या सर्वांबद्दल आम्ही विभागीय आयुक्तांबरोबरच सर्व अधिकाऱ्यांची बैठक घेतली. या बैठकीत चर्चेदरम्यान त्यांनी सूचना दिलेल्या आहेत, असे अजित पवार यांनी सांगितले.

२०२० मध्ये कोरोनाने पुणेकरांनाही वेढले होते. त्यावेळेस दर आठवड्याला बैठक घ्यायचो आणि सर्वांना जबाबदारीचे वाटप करुन संपूर्ण यंत्रणा कामाला लावायचो आणि त्यामधून आपण बाहेर पडलो. आता करोनाच्या पार्श्वभूमीवर देशात रुग्णांची संख्या वाढली आहे.

सर्वात जास्त रुग्ण केरळमध्ये बघायला मिळत आहेत, असे अजित पवार म्हणाले. आरोग्य मंत्री प्रकाश आबिटकर सतत यावर लक्ष ठेऊन आहेत. दर आठवड्याला मंत्रिमंडळ बैठकीत मुख्यमंत्र्यांच्या उपस्थितीत आढावा दिला जातो, अशी माहिती त्यांनी दिली.

घाबरुन जाण्याचं कारण नाही 

नागरिकांना घाबरुन जाण्याचे कारण नाही, पण ज्यांची वय जास्त आहेत, वयस्कर लोक आहेत त्यांनी अधिक काळजी घेण्याचे आवाहन अजित पवार यांनी केले. खोकला किंवा शिंक आल्यास नॅपकिन वापरण्याची गरज आहे, अशी काही काळजी घेतली गेली पाहिजे, असेही अजित पवार यांनी सांगितले. तसेच यासंदर्भातील सूचना प्रशासनाला दिल्या असल्याचे देखील अजित पवार यांनी सांगितले.

चार जणांचा मृत्यू

राज्यात दिवसेंदिवस करोना रुग्णांच्या संख्येत वाढ होत असून, शुक्रवारी करोनाचे 102 नवे रुग्ण आढळून आले आहेत. यामुळे आता राज्यातील करोना रुग्णांची संख्या 1 हजार 914 वर जाऊन पोहोचली आहे. राज्यामध्ये शुक्रवारी करोनामुळे चौघांचा मृत्यू झाला आहे. मृतांची संख्या 25 झाली आहे. पुणे शहरातही कोरोना रुग्ण आढळून येत आहे. पुणे महानगरपालिकेच्या हद्दीत 26, तर पिंपरी चिंचवड महानगरपालिका क्षेत्रात पाच रुग्ण आढळून आले आहेत.

हेही वाचा: “बच्चू कडूंच्या मागण्या मान्य करा, अन्यथा राज्यभर आंदोलन करू”; नाना पटोलेंचा इशारा