Pankaja Munde । पहलगाममध्ये झालेल्या दहशतवादी हल्ल्याचा बदला घेण्यासाठी भारताने पाकिस्तानवर ‘ऑपरेशन सिंदूर’ अंतर्गत जोरदार एअरस्ट्राईक केला. यात पाकिस्तान आणि पाकव्याप्त काश्मीरमधील दहशतवाद्यांचे ९ तळ उद्ध्वस्त करण्यात आले. यात १०० हून अधिक दहशतवादी मारले गेले. यानंतर बिथरलेल्या पाकिस्तानने भारताच्या १५ शहरांवर हवाई हल्ल्याचा प्रयत्न केला. भारतीय सुरक्षा दलांनी भारताच्या अनेक सीमावर्ती भागात पाकिस्तानने केलेले ड्रोन आणि क्षेपणास्त्र हल्ले वेळीच उधळून लावले आहेत. भारतीय वायूदलाने पाकिस्तानातील प्रमुख शहरांवर रात्रभर ड्रोन हल्ले करत शत्रूला जबर धक्का दिला आहे. यामुळे भारत-पाकिस्तानमधील तणाव अधिक तीव्र झाल्याचे दिसत आहे. या पार्शवभूमीवर महाराष्ट्रात देखील सुक्षा यंत्रणा सतर्क झाल्या आहेत. यानंतर काही ठिकाणी हेलिकॉप्टरची उड्डाणे देखील रद्द करण्यात आली आहेत. राज्याचे उपमुख्यमंत्री अजित पवार यांच्यानंतर पर्यावरण मंत्री पंकजा मुंडे यांच्या देखील हेलिकॉप्टरचे उड्डाण रद्द करण्यात आले आहे. भारत-पाकिस्तान तणावाच्या पार्श्वभूमीवर मंत्री पंकजा मुंडे यांच्या हेलिकॉप्टर उड्डाणाला परवानगी देण्यात आली नाही. हेलिकॉप्टर उड्डाणाला परवानगी नसल्याने पर्यावरण मंत्री पंकजा मुंडे यांचा नाशिक दौरा रद्द झाला आहे. पंकजा मुंडे या शिरुरहून हेलिकॉप्टरने नाशिकला येणार होत्या, मात्र, आता त्यांचा दौरा रद्द झाला आहे. मुंबई एअपोर्टवर पहाटे ड्रोनच्या घिरट्या मु्ंबईच्या साकिनाका परिसरातून एक धक्कादायक बातमी समोर आली आहे. मुंबई आंतरराष्ट्रीय विमानतळाजवळ ड्रोन दिसल्याची माहिती समोर आली आहे. या घटनेची माहिती मिळताच परिसरात एकच खळबळ उडाली आहे. याबाबत मुंबई पोलिसांच्या मुख्य नियंत्रण कक्षाला पहाटे सव्वा पाच वाजण्याच्या सुमारास माहिती मिळाली. साकीनाका परिसरातील हजरत तय्यद जलाल (बैगन शाहा दर्गा) मशिदीच्यावर ड्रोन फिरत आहे. दरम्यान, काही वेळाने हा ड्रोन झोपडपट्टी भागात नाहीसा झाला. घटनेचे गांभीर्य ओळखून पोलिसांनी तातडीने कॉम्बिंग ऑपरेशन सुरू केले असून, ड्रोन उडवणाऱ्याचा शोध घेतला जात आहे. अजित पवार साताऱ्याहून बायरोड मुंबईला रवाना राज्याचे उपमुख्यमंत्री अजित पवार यांच्या देखील हेलिकॉप्टरचे उड्डाण करण्यास परवानगी नाकारण्यात आल्याची प्राथमिक माहिती मिळत आहे. अजित पवार हे सध्या साताऱ्यात असून ते बायरोड मुंबईला रवाना झाले असल्याची माहिती मिळत आहे.
