पुणे : गेल्या काही महिन्यांत पुण्यातील युवक संघटनांमध्ये निर्माण झालेले मतभेद, वाद आणि वाढलेली आक्रमकता यावर सकारात्मक संवाद साधण्यासाठी सर्वपक्षीय युवक संघटनांच्या प्रतिनिधींची शुक्रवारी वैशाली येथे अनौपचारिक नाश्ता भेट झाली.

राजकीय विचारधारा वेगवेगळ्या असल्या तरी वैचारिक मतभेदांचे रूपांतर वैयक्तिक द्वेषात होऊ नये, यावर यावेळी एकमत झाले. त्यामुळे पुण्याच्या राजकीय संस्कृतीचे वेगळेपण पुन्हा एकदा समोर आले आहे.

राजकीय विचारधारा आणि पक्षीय भूमिका वेगळ्या असल्या तरी शहरातील युवकांमध्ये संवादाचे आणि सलोख्याचे वातावरण राहावे, यासाठी भविष्यातही अशा अनौपचारिक भेटीगाठी सुरू ठेवण्याची भूमिका यावेळी व्यक्त करण्यात आली. विशेष म्हणून याच युवक संघटनांमधून शहरात अनेक राजकीय नेते तयार झालेले आहेत.

गेल्या काही महिन्यांमध्ये शहरात वेगवेगळया राजकीय मुद्यांवरून मोठया प्रमाणात सर्वच पक्षाच्या युवक संघटना आक्रमक भूमिका घेत आहेत. त्यावरून अनेकदा पोलिसां पर्यंत ही प्रकरणे गेली आहे. त्यातच युवक संघटनांमध्ये राजकीय मुद्द्यांवरून सातत्याने आरोप-प्रत्यारोप आणि संघर्षाचे वातावरण निर्माण होत आहे.

या पार्श्वभूमीवर राजकीय मतभेद बाजूला ठेवून एकमेकांशी संवाद साधण्यासाठी ही अनौपचारिक भेट आयोजित करण्यात आली होती. ‘स्पर्धा आणि संघर्ष विचारांचा असावा, व्यक्तींचा नाही,’ असा संदेश या भेटीतून देण्यात आला.

यावेळी युवक काँग्रेसचे अक्षय जैन, सौरभ आमराळे, भूषण रानभरे, भारतीय जनता युवा मोर्चाच्या नगरसेविका निवेदिता एकबोटे, दुष्यंत मोहोळ, युवासेनेचे किरण साळी, मनसेचे धनंजय दळवी, राष्ट्रवादी काँग्रेस (शरदचंद्र पवार) युवती काँग्रेसच्या मनाली भिलारे, युवासेना (उद्धव बाळासाहेब ठाकरे)चे राम थरकुडे, परेश खांडके, राष्ट्रवादी काँग्रेस (अजित पवार)च्या लावण्या शिंदे, राष्ट्रवादी काँग्रेस (शरदचंद्र पवार) युवक काँग्रेसचे किशोर कांबळे, अजिंक्य पालकर तसेच वंदे मातरमचे लेशपाल जवळगे उपस्थित होते.

हेही वाचा: 

Android Tips: फोनमधून चुकून डिलीट झालेलं नोटिफिकेशन पुन्हा पाहता येतं! Android मधील ‘या’ फीचरचा असा करा वापर