Pune ZP School – पुणे जिल्हा परिषदेच्या ग्रामीण भागातील शाळांमध्ये राज्य शासनाच्या पवित्र पोर्टलच्या माध्यमातून पहिल्या टप्प्यात तब्बल ४३६ शिक्षक उपलब्ध झाले आहेत. येत्या दहा सप्टेंबरपर्यंत हे सर्व शिक्षक प्रत्यक्ष शाळांत रुजू होणार असून, यामुळे जिल्ह्यातील ९७ टक्के शिक्षकांची पदे भरली जाणार आहेत. यामुळे ग्रामीण भागातील विद्यार्थ्यांचे होणारे शैक्षणिक नुकसान टळणार असून गुणवत्तेत मोठी सुधारणा अपेक्षित आहे.

जिल्हा परिषदेचे उपाध्यक्ष विवेक वळसे-पाटील यांनी शुक्रवारी माहिती दिली. या वेळी प्राथमिक शिक्षणाधिकारी ललिता दहितुले उपस्थित होत्या. जिल्हा परिषदेअंतर्गत रिक्त असलेल्या ५९३ पदांचा प्रस्ताव शासनाकडे पाठवण्यात आला होता. त्यापैकी पहिल्या टप्प्यात ४३६ शिक्षक उपलब्ध झाले असून, उर्वरित पदे दुसऱ्या टप्प्यात भरली जाणार आहेत.

प्रक्रियेचा पुढील टप्पा
येत्या दोन दिवसांत प्राथमिक शिक्षण विभागाकडून कागदपत्र पडताळणी आणि समुपदेशनाचे सविस्तर वेळापत्रक प्रसिद्ध केले जाईल. त्यानुसार पहिल्यांदा उमेदवारांच्या मूळ कागदपत्रांची कसून पडताळणी होईल. त्यानंतर पारदर्शक समुपदेशनाद्वारे शिक्षकांना रिक्त शाळांमध्ये नियुक्तीचे आदेश दिले जातील. पुढील १० ते १५ दिवसांत सर्व शिक्षक संबंधित शाळांचा पदभार स्वीकारतील.

विद्यार्थ्यांना लाभ
शिक्षक हा विद्यार्थ्यांच्या गुणवत्तापूर्ण शिक्षणाचा केंद्रबिंदू आहे. उपलब्ध झालेले ४३६ शिक्षक तातडीने शाळांमध्ये रुजू झाल्यास त्याचा थेट लाभ विद्यार्थ्यांना मिळेल. शिक्षकांची कमतरता दूर करून शैक्षणिक दर्जा उंचावणे हा आमचा मुख्य प्राधान्यक्रम आहे, अशी माहिती उपाध्यक्ष विवेक वळसे पाटील यांनी दिली.

जिल्ह्याचा पट आणि आकडेवारी
1.एकूण प्राथमिक शाळा : ३,५१६
2.एकूण विद्यार्थी संख्या : २ लाखांपेक्षा अधिक
3.सध्या कार्यरत शिक्षक : १०,६४९
4.एकूण रिक्त पदे : ६९५ (प्रस्ताव पाठवलेली पदे: ५९३)
5.पहिल्या टप्प्यात मिळालेले शिक्षक : ४३६