National Sports Day: श्रीलंकेत रंगणार्याा जीतो प्रीमियर लीगच्या (जेपीएल) पहिल्या हंगामात पुण्याचा अधिकृत संघ असलेला ‘पुणे पेशवाज’ दमदार कामगिरीसाठी सज्ज झाला आहे. जीतो अपेक्सतर्फे आयोजित ही स्पर्धा 24 ऑगस्टपासून सुरू झाली असून 5 सप्टेंबरपर्यंत कोलंबो येथे रंगणार आहे. या स्पर्धेत ‘पुणे पेशवाज’ पुण्याचे प्रतिनिधित्व करत असून, आंतरराष्ट्रीय क्रिकेटच्या व्यासपीठावर आपली वेगळी ओळख निर्माण करण्याचे संघाचे लक्ष्य आहे.

‘पुणे पेशवाज’च्या संघाचे अनावरण द कोरिंथियन्स रिसॉर्ट क्लब येथे उत्साहपूर्ण वातावरणात करण्यात आले. या सोहळ्यास जीतो अपेक्सचे राष्ट्रीय अध्यक्ष विजय भंडारी, ‘जीतो स्पोर्ट्स’चे अध्यक्ष विकी ओसवाल यांच्यासह जीतोच्या विविध विभागांतील मान्यवर उपस्थित होते. विजय भंडारी यांनी जेपीएलच्या माध्यमातून क्रिकेटला व्यापक आणि जागतिक व्यासपीठ देण्याच्या जीतोच्या उद्दिष्टावर प्रकाश टाकला.

तर विकी ओसवाल यांनी पहिल्या हंगामासह लीगच्या भविष्यातील वाटचालीचा आराखडा स्पष्ट केला. विजय भंडारी, राजेशकुमार सांकला, विशाल चोरडिया, राजेंद्र जैन, डॉ. रमेश तेजावत, सुजित भटेवरा, दीपक जैन, अमोल कुचेरिया आणि निकुंज ओसवाल हे ‘पुणे पेशवाज’चे मालक आहेत. पुण्याचा अभिमान, जोश आणि क्रीडाप्रेम यांचे प्रतिनिधित्व करणारा संघ उभारण्याचा निर्धार त्यांनी व्यक्त केला आहे. त्यामुळे हा संघ केवळ क्रिकेट फ्रँचायझी न राहता पुण्याच्या क्रीडा संस्कृतीचे प्रतिनिधित्व करणारा संघ म्हणून उभा करण्याचा प्रयत्न आहे अश्या भावना विजय भंडारी व्यक्त करतात.

पेशवाजचा संघ
संघाचे मुख्य प्रशिक्षक श्रीकांत मुंढे असून, अनुभवी ऋषभ राठोडकडे नेतृत्वाची धुरा सोपवण्यात आली आहे. यश नहार उपकर्णधार आहे. संघात अनुपम संकलेचा, स्वप्नील गुगळे, निलय शिंगवी, नील गांधी, निखिल लुणावत, अनिकेत पोरवाल, दीपक डांगी, हर्ष संघवी, हर्ष ओसवाल, अमन दोशी, अनुज छाजेड, यश बांबोळी, सौरभ शिंगवी, यश दागा, ईशान ओसवाल, निखिल जैन, चिराग गदिया, श्रेयांक जैन, रौनक खंडेलवाल, रौनक पारेख, प्रचित भलगट आणि क्षितिज जैन यांचा समावेश आहे. शुभम चव्हाण स्पोर्ट्स मॅन्युअल थेरपिस्ट, तर डॉ. श्रेयश बाफना फिजिओथेरपिस्ट म्हणून संघासोबत आहेत.

संघाची मोठी ताकद
‘पुणे पेशवाज’च्या अधिकृत गीताचेही संघाच्या अनावरण सोहळ्यात भव्य प्रकाशन करण्यात आले. या गीतामुळे संघाला स्वतंत्र ओळख आणि प्रेरणेची नवी ऊर्जा मिळाली आहे. खेळाडू, प्रशिक्षक आणि सपोर्ट स्टाफ यांच्यातील समन्वयासोबतच पुणेकरांचा पाठिंबा ही संघाची मोठी ताकद ठरणार आहे. जेपीएलचा पहिला हंगाम असल्याने प्रत्येक संघासाठी हे नवे आव्हान आहे.

अशा परिस्थितीत अनुभवी रुषभ राठोडचे नेतृत्व, श्रीकांत मुंढे यांचे मार्गदर्शन आणि संतुलित खेळाडूंची फळी यामुळे ‘पुणे पेशवाज’कडून चांगल्या कामगिरीच्या अपेक्षा आहेत. कोलंबोच्या मैदानावर पुण्याचा क्रीडाजोश दाखवत स्पर्धेत ठसा उमटवण्याचे आव्हान आता ‘पुणे पेशवाज’समोर आहे. रणजीचा अनुभव, नेतृत्वाची ताकद आणि जिंकण्याची महत्त्वाकांक्षा या त्रिसूत्रीच्या जोरावर पुण्याचा हा संघ जेपीएलमध्ये आपली ‘पेशवाई’ गाजवण्यासाठी मैदानात उतरणार आहे.

राठोडच्या खांद्यावर नेतृत्वाची जबाबदारी
‘पुणे पेशवाज’च्या मोहिमेतील प्रमुख आकर्षण म्हणजे कर्णधार ऋषभ राठोड. रणजी क्रिकेटचा प्रदीर्घ अनुभव आणि विविध स्पर्धांमध्ये नेतृत्व करण्याची संधी यामुळे राठोडकडून संघाला मोठ्या अपेक्षा आहेत. 2017 ते 2022 या कालावधीत त्यांनी विदर्भ रणजी संघाचे प्रतिनिधित्व केले. त्यानंतर 2022 ते 2025 दरम्यान महाराष्ट्र रणजी संघाचे वरिष्ठ खेळाडू म्हणून त्यांनी योगदान दिले. रणजी क्रिकेटमधील अनुभवाबरोबरच महाराष्ट्र प्रीमियर लीगमधील नेतृत्वाचा अनुभवही राठोडच्या जमेची बाजू आहे.

रायगड रॉयल्सचे नेतृत्व करताना त्यांनी संघाला अंतिम फेरीपर्यंत पोहोचवले. दबावाच्या परिस्थितीत निर्णय घेणे, सहकार्यांाना आत्मविश्वास देणे आणि संघातील खेळाडूंच्या क्षमतेचा योग्य वापर करणे ही त्यांच्या नेतृत्वाची वैशिष्ट्ये ठरली आहेत. राठोड यांचा श्रीलंकेशीही विशेष संबंध आहे. 2015 मध्ये श्रीलंकेत झालेल्या रेड बुल वर्ल्ड कपमध्ये त्यांनी सहभाग घेतला होता. आता त्याच देशात जेपीएलच्या माध्यमातून पुन्हा एकदा नेतृत्वाची नवी जबाबदारी त्यांच्या खांद्यावर आली आहे. त्यामुळे श्रीलंकेतील वातावरण आणि क्रिकेटचा अनुभव त्यांच्यासाठी निश्चितच उपयुक्त ठरू शकतो.

– शब्दांकन: हर्षद कटारिया