भिगवण : करोना काळापासून भिगवण रेल्वे स्थानकावर बंद असलेले एक्स्प्रेस गाड्यांचे थांबे अद्याप पूर्ववत न झाल्याने प्रवाशांमध्ये तीव्र नाराजी आहे. विद्यार्थी, नोकरदार, व्यापारी आणि सर्वसामान्य प्रवाशांची गैरसोय होत असून, स्थानकावर अवलंबून असलेल्या छोट्या व्यावसायिकांच्या रोजगारावरही परिणाम झाला आहे. या पार्श्वभूमीवर गुरुवारी (दि. 22) आयोजित रेल्वेच्या ‘रेल जनसंवाद’ कार्यक्रमात नागरिकांनी विविध मागण्यांची निवेदने सादर केली. वारंवार मागण्या करूनही प्रश्न सुटत नसल्याने आता आश्वासनांऐवजी प्रत्यक्ष कृती करावी, अशी ठाम भूमिका नागरिकांनी मांडली.

सोलापूर रेल्वे विभागाच्या वतीने आयोजित या कार्यक्रमाला रेल्वेचे जनसंपर्क अधिकारी, स्टेशन मॅनेजर आणि अन्य अधिकारी उपस्थित होते. भिगवणसह डिकसळ, राजेगाव, तक्रारवाडी, खानोटा, मदनवाडी आणि स्वामी चिंचोली आदी गावांतील ग्रामस्थ, प्रवासी, विद्यार्थी व राजकीय पदाधिकार्‍यांनी आपल्या समस्या मांडल्या. ग्रामपंचायती, रेल्वे प्रवासी संघटना तसेच शाळा-महाविद्यालयांच्या वतीनेही लेखी निवेदने देण्यात आली. जनसंपर्क अधिकारी कुलकर्णी यांनी ही निवेदने स्वीकारून वरिष्ठ विभागाकडे पाठविण्याचे आश्वासन दिले.

भिगवण रेल्वे स्थानकावर पूर्वी थांबणार्‍या मुंबई-हैदराबाद हुसेनसागर एक्स्प्रेस, चेन्नई मेल आणि सिद्धेश्वर एक्स्प्रेस या गाड्यांचे थांबे पुन्हा सुरू करावेत, अशी प्रमुख मागणी नागरिकांनी केली. विशेषतः सकाळी 6 ते 9 या वेळेत पुण्याकडे जाणार्‍या प्रवाशांची गैरसोय दूर करण्यासाठी किमान एका एक्स्प्रेस गाडीला नियमित थांबा द्यावा, अशी मागणीही करण्यात आली.

करोना काळापूर्वी सकाळी आणि सायंकाळी एक्स्प्रेस गाड्यांचे थांबे उपलब्ध असल्याने विद्यार्थी, नोकरदार आणि व्यावसायिकांना पुणे, सोलापूरसह विविध शहरांत ये-जा करणे सोयीचे होते. मात्र, थांबे बंद झाल्यापासून प्रवाशांना पर्यायी वाहतुकीचा आधार घ्यावा लागत आहे. त्यामुळे प्रवासासाठी अधिक वेळ आणि पैसा खर्च करावा लागत असल्याचे नागरिकांनी सांगितले.

रेल्वे गाड्यांचे थांबे बंद झाल्याचा फटका रिक्षाचालक, खाद्यपदार्थ विक्रेते आणि स्थानक परिसरातील अन्य छोट्या व्यावसायिकांना बसला आहे. प्रवाशांची वर्दळ कमी झाल्याने त्यांच्या व्यवसायावर परिणाम झाला असून, अनेकांच्या रोजगाराचा प्रश्न निर्माण झाला आहे. त्यामुळे रेल्वे थांबे पूर्ववत करणे हा केवळ प्रवाशांच्या सोयीचा प्रश्न नसून स्थानिक अर्थव्यवस्था आणि रोजगाराशी संबंधित विषय असल्याचे नागरिकांनी स्पष्ट केले.

रेल्वे प्रशासनाने प्रवाशांच्या अडचणींची गांभीर्याने दखल घेऊन आवश्यक एक्स्प्रेस गाड्यांचे थांबे पूर्ववत करावेत आणि आंदोलनातील गुन्ह्यांबाबत स्पष्ट भूमिका घ्यावी, अशी मागणी नागरिकांनी केली आहे. आता वरिष्ठ रेल्वे प्रशासन या मागण्यांवर काय निर्णय घेते, याकडे भिगवणसह परिसरातील गावांचे लक्ष लागले आहे.

आंदोलनातील गुन्हे मागे घेण्याची मागणी

भिगवण स्थानकावर एक्स्प्रेस गाड्यांना थांबा मिळावा, या मागणीसाठी यापूर्वी रेल रोको आंदोलन करण्यात आले होते. या आंदोलनात सहभागी झालेल्या ग्रामस्थांवर रेल्वे प्रशासनाने गुन्हे दाखल केले होते. हे गुन्हे तातडीने मागे घ्यावेत, अशी मागणीही रेल जनसंवाद कार्यक्रमात करण्यात आली. थांबे पूर्ववत करण्यासाठी यापूर्वी अनेकदा निवेदने देण्यात आली असून, आंदोलनेही झाली आहेत. निवडणुकांच्या काळात थांबे सुरू करण्याची आश्वासने दिली जातात; मात्र प्रत्यक्ष अंमलबजावणी होत नसल्याची टीका नागरिकांनी केली. रेल्वे थांब्यांचा प्रश्न अद्याप प्रलंबित असताना आंदोलनातील गुन्ह्यांबाबतही निर्णय झालेला नसल्याने नागरिकांमध्ये असंतोष आहे.