Maharashtra Politics : मनोज जरांगे यांनी पत्रकार परिषदेत एक ऑडिओ क्लिप ऐकवल्यानंतर राज्याच्या राजकीय वर्तुळात मोठी खळबळ उडाली आहे. या क्लिपवरून सत्ताधारी महायुतीमधील नेत्यांमध्ये आरोप-प्रत्यारोप सुरू झाले आहेत. भाजपला हाताशी धरून एकनाथ शिंदे यांच्याविरोधात षडयंत्र रचले जात असल्याचा गंभीर आरोप शिवसेना नेते रामदास कदम यांनी केला. त्यामुळे भाजप आणि शिवसेनेमध्ये संघर्ष निर्माण झाल्याची चर्चा रंगू लागली आहे. दरम्यान, या ऑडिओ क्लिपची सत्यता तपासण्याची मागणीही केली जात आहे. या संपूर्ण प्रकरणावर आता भाजपचे ज्येष्ठ नेते सुधीर मुनगंटीवार यांनी प्रतिक्रिया दिली आहे.

‘एकनाथ शिंदे आमचे मित्र आहेत, पुढेही राहतील’

जनतेचा आशीर्वाद हा केवळ पदाशी संबंधित नसून तो नेत्याच्या कामाशी जोडलेला असतो, असे मत सुधीर मुनगंटीवार यांनी व्यक्त केले. भाजपला एकनाथ शिंदे यांची भीती वाटू लागली आहे का, असा प्रश्न त्यांना विचारण्यात आला. त्यावर उत्तर देताना मुनगंटीवार म्हणाले, “एकनाथ शिंदेंची भीती कशाला वाटेल? शिंदे आमचे मित्र आहेत आणि पुढेही राहतील.”

ऑडिओ क्लिपवरून महायुतीमध्ये सुरू असलेल्या आरोप-प्रत्यारोपांबाबतही त्यांनी आपली भूमिका स्पष्ट केली. महायुतीतील नेत्यांनी एकमेकांविरोधात अशी विधाने करणे योग्य नसल्याचे त्यांनी सांगितले. तसेच अशा कपोलकल्पित क्लिपकडे कुणीही लक्ष देऊ नये, असे आवाहनही त्यांनी केले.

या वादामागे राजकीय डावपेच असण्याची शक्यताही त्यांनी व्यक्त केली. “कॉमन सेन्स नावाचा एक शब्द आहे. असं कुणी ५०० कोटी रुपये देईल का? जरांगे हे देखील सच्चे कार्यकर्ते आहेत, ते कशाला ५०० कोटी रुपये घेतील?” असा सवाल मुनगंटीवार यांनी उपस्थित केला. सदर प्रतिक्रिया त्यांनी एका न्यूज वाहिनीसोबत बोलताना दिली.

श्रीकांत शिंदे यांच्या भूमिकेकडे राजकीय वर्तुळाचे लक्ष

या ऑडिओ क्लिपमध्ये भाजपशी संबंधित असल्याचा दावा करण्यात आलेली एक व्यक्ती श्रीकांत शिंदे यांच्या माध्यमातून मनोज जरांगे यांना ५०० कोटी रुपये दिल्याचा कथित उल्लेख करण्यात आला आहे. या प्रकरणात श्रीकांत शिंदे यांनी अद्याप सार्वजनिकरीत्या आपली भूमिका मांडलेली नसल्याने त्यांच्या प्रतिक्रियेकडे सर्वांचे लक्ष लागले आहे. मनोज जरांगे यांच्याशी संबंधित ५०० कोटी रुपयांच्या कथित व्यवहाराच्या दाव्यावर श्रीकांत शिंदे काय बोलणार, तसेच ऑडिओ क्लिपच्या सत्यतेबाबत पुढे काय माहिती समोर येणार, याबाबत विविध चर्चांना उधाण आले आहे.

Fauzi Teaser: हिटलर ते नेताजी सुभाषचंद्र बोस! ‘फौजी’मध्ये प्रभासचा विद्रोही अवतार; टीझरने वाढवली चाहत्यांची उत्सुकता