पुणे : शहरात सध्या सुरू असलेली १३ टक्के पाणीकपात पुरेशी असून, ती वाढवून २० टक्के करण्याची कोणतीही आवश्यकता नाही, असा दावा सजग नागरिक मंचाचे अध्यक्ष विवेक वेलणकर यांनी केला आहे.

खडकवासला धरणसाखळीतील उपलब्ध पाणीसाठा आणि आगामी महिन्यांतील पुण्याची पाण्याची गरज यांची आकडेवारी मांडत त्यांनी पाणीकपात वाढविण्याच्या निर्णयाला विरोध केला आहे.

पुण्याच्या पाणीकपातीसंदर्भात २८ ऑक्टोबर रोजी जलसंपदा विभाग आणि सर्व राजकीय पक्षांची बैठक होणार आहे. जिल्हाधिकाऱ्यांनी २० टक्के पाणीकपातीची सूचना केल्याच्या पार्श्वभूमीवर वेलणकर यांनी हे निवेदन दिले आहे.

त्याचबरोबर शहरातील पाणीगळती कमी करणे आणि सर्व भागांत समान पाणीपुरवठा सुनिश्चित करण्यासाठी गेल्या पाच वर्षांत दोन हजार कोटी रुपये खर्चून उभारण्यात आलेल्या समान पाणीपुरवठा योजनेतून नेमके काय साध्य झाले, याची श्वेतपत्रिका प्रसिद्ध करावी, अशी मागणीही वेलणकर यांनी केली आहे.

काय आहे मंचाची मागणी? 
१५ ऑक्टोबर रोजी खडकवासला धरणसाखळीत २५.६६ टीएमसी पाणीसाठा शिल्लक होता. कपात नसल्यास महापालिकेला दरमहा १.६ टीएमसी पाणी लागते. या हिशेबाने १५ ऑक्टोबर २०२६ ते ३१ ऑगस्ट २०२७ या कालावधीत शहराला १७.४० टीएमसी पाणी लागेल.

मात्र, दर गुरुवारी पाणीपुरवठा बंद ठेवल्यास सुमारे १३ टक्के बचत होऊन ही गरज १५ टीएमसीपर्यंत खाली येईल. तर पुण्यासाठी १५ टीएमसी पाणी राखीव ठेवल्यानंतर धरणसाखळीत १०.६६ टीएमसी पाणी शिल्लक राहील.

त्यातील तीन टीएमसी पाण्याचे बाष्पीभवन गृहीत धरले, तरी सिंचनासाठी तसेच दौंड-इंदापूर परिसरातील पिण्याच्या पाण्याचे तलाव भरण्यासाठी ७.६६ टीएमसी पाणी उपलब्ध राहू शकते. याशिवाय, रब्बी हंगामासाठी नियोजित पाणी, पुढील आवर्तने आणि आषाढी वारीसाठी पाण्याचे नियोजन करता येईल.

मुंढवा जॅकवेलमधून बेबी कालव्याद्वारे शेतीसाठी सुमारे पाच टीएमसी पाणी देणेही शक्य असल्याचे त्यांनी नमूद केले आहे. त्यामुळे सध्याची पाणीकपात ३१ ऑगस्ट २०२७ पर्यंत कायम ठेवावी; त्यात आणखी वाढ करण्याची आवश्यकता नाही, अशी भूमिका मंचाने मांडली आहे.

Family Court : पक्षकाराची सही व प्रतिज्ञापत्राविना पोटगीचा अर्ज कौटुंबिक न्यायालयाने फेटाळला; अन्य एक मागणीही नामंजूर