Kalyan Stray Dog – ठाणे जिल्ह्यातील कल्याण भागात एका पिसाळलेल्या मोकाट श्‍वानाने सात तासांत सुमारे १३० जणांवर हल्ला करून त्यांना चावा घेतला आहे. या घटनेत २५ जणांना रुग्णालयात दाखल करावे लागले, तर या हल्ल्यात ११ वर्षांची मुलगी गंभीर जखमी झाली आहे.

रविवारी दुपारी २ च्या सुमारास संदीप हॉटेल परिसरात या आक्रमक श्‍वानाने वाटसरू, दुचाकीस्वार आणि रिक्षातील प्रवाशांवर झेप घेतल्याने पादचारी व स्थानिकांची धावपळ उडाली.

प्रत्यक्षदर्शी आणि कल्याण-डोंबिवली महानगरपालिकेच्या आरोग्य अधिकाऱ्यांनी सांगितले की, हे श्‍वान रस्ते आणि गल्ल्यांमधून चालणाऱ्या लोकांवर मागून येऊन झेप घेत होते.

या प्रकारामुळे निर्माण झालेल्या भीतीमुळे बिर्ला कॉलेज रोड, जुने आरटीओ कार्यालय आणि भोईरवाडी परिसरातील रहिवाशांना घरातच राहावे लागले, तसेच रविवार असूनही मुलांना खेळाच्या मैदानांवर जाण्यापासून रोखावे लागले.

किमान २५ पीडितांवर सध्या महापालिकेच्या रुक्मिणीबाई रुग्णालयात उपचार सुरू आहेत, तर गंभीर जखमी झालेल्या ११ वर्षांच्या मुलीला पुढील उपचारांसाठी मुंबईतील लोकमान्य टिळक महानगरपालिका सर्वसाधारण रुग्णालयात (सायन रुग्णालय) तातडीने हलवण्यात आले.

रविवार संध्याकाळपर्यंत कुत्र्याने चावा घेतल्याच्या ११० ते १३० घटनांची नोंद झाली होती आणि प्राथमिक उपचारानंतर अनेक रुग्णांना घरी सोडण्यात आले, असे रुक्मिणीबाई रुग्णालयाचे वैद्यकीय अधिकारी डॉ. संदीप पगारे यांनी सांगितले.

दरम्यान, संतप्त स्थानिकांनी कल्याण-डोंबिवली महानगरपालिकेवर उशिरा प्रतिसाद दिल्याचा आरोप केला. रविवारची सुट्टी असल्याने मदतीसाठी केलेल्या वारंवारच्या कॉल्सना कोणताही प्रतिसाद मिळाला नाही, असे त्यांनी म्हटले.

स्थानिकांनी महापालिकेच्या श्‍वानाच्या नसबंदी केंद्राची सखोल चौकशी करण्याची मागणी केली. या केंद्रावर यापूर्वी भ्रष्टाचाराचे आरोप झाले आहेत. त्या पिसाळलेल्या श्‍वानाचा शोध लागला आहे का किंवा त्याला पकडण्यात आले आहे का, याबाबत महापालिका प्रशासनाने अद्याप कोणतीही पुष्टी केलेली नाही.